Ахсынньы 25 күнүгэр Тойбохойго С.Г. Кривошапкин аатынан Оҕолорго көмө киинин үлэhиттэригэр уонна иитиллээччилэригэр бэлиэ күн буолла.
edersaas.ru
«Туймаада» ааксыйалаах уопсастыба үп-харчы агропромышленнай тэрилтэтин (салайааччы — Бордоҥ нэһилиэгиттэн төрүттээх киэн туттар биир дойдулаахпыт, СӨ норуотун хаһаайыстыбатын үтүөлээх үлэһитэ Петр Ефремов) тыа сирин кытта улэлэhэр отделын салайааччыта Олег Марков ыалдьыттаата. Олег Петрович – “Туймаада” үлэhиттэрин профсоюhун бэрэссэдээтэлэ, Саха сирин Аграрнай баартыйатын бэлитиичэскэй сэбиэтин чилиэнэ, Саха Өрөспүүбүлүкэтин үтүөлээх зоотехнига. Кини суол-иис ырааҕын аахсыбакка, күндү бэлэхтэрдээх тиийэн кэлэн, үүнээри турар Байанай сылынан оҕолорго да, үлэhиттэргэ да үөрүү өрөгөйүн бэлэхтээтэ.
Ол курдук, Олег Петрович Тойбохойго үктэнээт, нэhилиэк баhылыга, Аграрнай баартыйа чилиэнэ Иван Попову көрсөн, баhылык сыллааҕы үлэтин түмүгүн билистэ, инникитин туохха ураты болҕомто ууруллуон сөбүгэр санаатын үллэһиннэ. Ол кэнниттэн Олег Марков Оҕо дьиэтигэр сылдьан, иитиллээччилэр олохторун-дьаhахтарын кытта билистэ.
Саамай долгутуулаах түгэнинэн, хаhан баҕарар буоларын курдук, бэлэх түҥэтиитэ буолла. Ол курдук, Оҕо дьиэтин отделларыгар компьютернай оргтехниканы бэлэх уунна. Маны таhынан Сунтаар улууhунааҕы Аграрнай баартыйа аатыттан иитиллээччилэр аhылыктарыгар анаан, 100 киилэ ынах этин биэрэргэ сэртипикээти тэрилтэ салайааччытыгар Станислав Егоровка туттарда. Онтон алын сүһүөх кылаас оҕолоругар «крутой» төлөпүөнү, үрдүкү кылаас оҕолоругар ноутбугу сэргэ, минньигэс аhылык арааһын истин-иhирэх эҕэрдэ тыллардаах, үтүө алгыс аргыстаах туттарбытыгар оҕолор дьоллонон, харахтара уратытык чаҕылыстылар. Өссө «Хатан», «Чуораанчык» сурунаалларга, «Бэлэм буол» хаһыакка сыл аҥаарыгар сурутуу оҥорон бэлэхтээтэ. Олег Петрович бэйэтэ да тулаайах хаалан, интэринээккэ иитиллэн, сэбиэскэй былаас үтүөтүнэн үрдүк үөрэхтэнэн, тыа хаhаайыстыбатын тэрилтэлэрин салайар үлэтигэр буспут-хаппыт киhи уйадыйан ылла.
«Туймаада» АУо кэлэктиибэ биир күннээх хамнаһын биэрэн туран, Үтүө дьыала харыйатын чэрчитинэн ааксыйаҕа кыттан, өйдүү сылдьар курдук дьоhун бэлэх оҥорбуттарыгар 11-с кылаас үөрэнээччитэ Алена Константинова иитиллээччилэр ааттарыттан махтанна уонна үөрэххэ, уопсастыбаннай олоххо ситиhиилээх буола улаатарга эрэннэрдэ.
Олег Петрович мантан киэһэ нэhилиэк баhылыгын сыллааҕы отчуотугар сылдьан, олохтоохторго Ил Дархан тыа хаhаайыстыбатын салаатын сайыннарарга анаммыт бырагырааматын билиhиннэрэн туран, бырагырааманы нэhилиэк сайдыытыгар тирэх оҥосторго сүбэ биэрдэ. Ону сэргэ, эргиэн бэтэрээннэригэр наҕараадалары туттартаата.
Түмүккэ нэhилиэк баhылыга Иван Попов уонна оҕо киинин дириэктэрэ Станислав Егоров олохтоохтор ааттарыттан махтал тылларын эттилэр, чэгиэн доруобуйаны, үлэлэригэр ситиһиилэри баҕардылар.
Валерий ИЛЛАРИОНОВ, “Саха сирэ” хаһыат, edersaas.ru саайтка анаан