Тойбохойго түөлбэлэринэн спартакиада

Бөлөххө киир:

Бэс ыйын 3 күнүгэр, өрөбүл күн, Тойбохой үгүс олохтооҕо “ Талах күрүө” диэн айылҕа маанылаан оҥорбут хатыҥ чараҥар хотоҕостуу субуста. Бу күн манна нэһилиэк  5 түөлбэҕэ арахсан, күөх сайыны уруйдуу спорт 7 көрүҥэр күөн көрүстэ.

edersaas.ru

Ким бастыҥын быһаарсар илин-кэлин түсүһүү киэһэ хойукка диэри сытыытык, өрө көтөҕүллүүлээхтик барда. Күнүс айылҕаҕа тахсыбычча кулуһун оттон, эбиэт буһарынан оллоон тула олорон ким хайдах кыстаабытын, сайын туох былааннааҕын ирэ-хоро кэпсэттилэр, нэһилиэк олоҕун тупсарарга санааларын үллэһиннилэр.

Күрэх түмүгэ ким хайдах тэрээһиннээҕин, түмсүүлээҕин ырылхайдык көрдөрдө. Ол курдук, “Порт-Арыы”  түөлбэ (салайааччы Айта Семенова) 4 көрүҥҥэ — бастакы, икки көрүҥҥэ — иккис, биир көрүҥҥэ үһүс буолан, 11 очукуолаах эрэллээхтик бастаата. “Чараҥ” түөлбэ (сал. М.С.Саввинова) II, оттон “Арҕаа-West” (сал. М.С.Саввинова) аҕыйах очукуонан хаалан, III миэстэни ылан, өрөгөй үөрүүтүн биллилэр.

Күрэх көрүҥнэригэр  оскуола оҕотуттан саҕалаан, саастаах киһи кыттар курдук балаһыанньа оҥоһуллубута киирсиилэри ордук сытыырхатта, ыһыылаах-хаһыылаах ыалдьааһыннар дьон санаатын көтөхтүлэр.

Спорт, култуура бэтэрээнэ Владимир Данилов салалтатынан судьуйалар В.В.Пермяков, А.И.Данилов, М.С. Саввинов күрэхтэһии үрдүк таһымҥа сытыы киирсиилээх барарын хааччыйдылар.

Нэһилиэк уһун кыһынтан босхолонон, күөх сайыны көрсүүтэ үрдүк таһымнаахтык, көхтөөхтүк барбытыттан дьон астынан тарҕаста, спартакиада дьону түмэр, биир сыалга сомоҕолуур сыалын ситтэ.

Валерий ИЛЛАРИОНОВ,  edersaas.ru  

саайтка анаан

+1
0
+1
0
+1
0
+1
0
+1
0
+1
0
+1
0