Дьокуускай куорат 17-с нүөмэрдээх оскуолатын 9 “В” кылааһын үөрэнээччилэрэ сэтинньигэ икки граны тэҥинэн сүүйдүлэр. Ол курдук, Сочига ыытыллыбыт аан дойдутааҕы бэстибээлгэ фольклор көрүҥэр кыттан, Гран-при буоллулар. Инньэ гынан, улахан кубогы кытта 40 тыһыынча солкуобайдаах гранынан бэлиэтэннилэр. Аны аҕыйах хоноот, “Үүнэр көлүөнэ фондатыттан” 100 тыһыынча солкуобайдаах граны тутар үөрүүтүн биллилэр.
edersaas.ru
Биир үтүө күн кылаас салайааччыта Надежда Афанасьевна Коротова “Үүнэр көлүөнэ фондата” “Добрая Якутия” бырагырааманан грант биллэрэр диэн батсаабынан суругу ааҕаат, биһиги саҕа амарах санаалаах, дьоҥҥо көмөлөһөр кылаас аҕыйах ини дии санаат, тута кыттарга быһаарыммыта. Ол курдук, ирдэбили тутуһан, үөрэнээччилэрин кытта түөрт сыл устата үлэлээбит үлэлэрин муспута, уопсайа, 68 сирэйдээх, букатын, кинигэ түмүллэн тахсыбыт.
Надежда Афанасьевна хаартыскаҕа түһэриинэн дьарыктаммыта быданнаата. Онон үөрэнээччилэрин хас биирдии хардыыларын үйэтитэр. Биир-биир хааһахтан ороон таһаарардыы кэпсээн истэҕин аайы, саҥа хартыына арыллан иһэр. Маҥнай 5-с кылаас оҕолоро мас олордуутуттан саҕалаабыттар. Омос көрдөххө, оскуола оҕолоро куораты көҕөрдүүттэн, ырааһырдыыттан ураты улахан үлэни саба тутуо суох курдуктар. Ол эрээри, тустаах кылаас сыыйа үлэтин хайысхатын кэҥэтэн, билигин номнуо дьиэ кэргэҥҥэ тиийэ көмөлөһөр буолбут. Ол курдук, күһүн аайы бааһыналарга тахсан сүүһүнэн куул хортуоппуйу, хаппыыстаны хомуйан, волонтер Антон Васильев нөҥүө булбут өрүү көмөлөһөр ыалларыгар түҥэтэр үтүө үгэһи олохтообуттар. Сылга иккитэ субуотунньукка тахсаллар, доруобуйаларынан хааччахтаах оҕолорго аһымал кэнсиэрдэргэ, ууга барбыттары өйүүр телемарафоннарга кыттыһаллар, күһүн аайы хомуурга тахсаллар, үһүс сылын Куораттааҕы оҕо анал дьиэтин кытта үлэлэһэллэр.
Аны Антон Васильевы кытта үлэлэспиттэрэ номнуо бэһис сылыгар барбыт. Сылга иккитэ хайаан даҕаны кыттыһан субуотунньуктууллар эбит. Быйыл кэҥэтэн, оскуолаларыгар сайынын “Үтүөнү оҥоруу” лааҕырын аһан үлэлэппиттэр.
Аны оскуолаларын бибилэтиэкэтигэр көмөлөспүттэрэ эмиэ бэһис сылыгар барбыт. Бүтүн 1800 үөрэнээччи учуобунньуга хас туоннаҕа тэҥнэһиэн санаан көрүҥ. Манна бибилэтиэкэрдэргэ үөрүүнэн тасыһар, наардаһар, нүөмэрдэһэр эмиэ 9-с «В» кылаас үөрэнээччилэрэ. Былырыын оннооҕор СӨ Үөрэҕин уонна наукатын министиэристибэтэ бэлиэтии көрөн, Оҕо көмүскэлин күнэ курдук эппиэтинэстээх тэрээһини ыытыспыттар.
Оҕолор үөрэҕи, үлэни, эбии дьарыгы тэҥинэн дьүөрэлииллэр. “Оҕо дьону кытта элбэхтэ алтыстаҕына уонна аһыныгас сүрэхтээх буоллаҕына, олоххо туохтан да иҥнэн турбат буола улаатар. Маннык тэрээһиннэр кылааһы түмэллэр. Кыттар буолан баран дьоһуннаахтык, кыайардыы ылсарбын ордоробун. Саамай сүрүнэ — оҕоҕо ситиһии усулуобуйатын олохтуохха наада”, – диэн Надежда Афанасьевна санаатын үллэстэр. Төһө даҕаны физика-математика хайысхалаах кылаас дэммитин иһин, бары эйгэҕэ барытыгар сыстаҕастар. Манна Екатерина, Алексей Егоровтар устуудьуйаларыгар да ыллыыр, Хатылаевтарга барабаанныыр, хомустуур, туойар оҕолор үгүстэр. Быһатын эттэххэ, эргиччи талааннаах кылаас. Ону сэтинньигэ Сочига ыытыллыбыт норуоттар икки ардыларынааҕы бэстибээлгэ Гран-при үрдүк аатын ылан кэлбиттэрэ дьэҥкэтик туоһулуур. Улахан кубогы кытта 40 тыһыынча солкуобайдаах гранынан наҕараадаламмыттар. Салгыы Оренбург куоракка ыытыллар бэстибээлгэ бараары оҥостоллор.
Ити курдук, кылаас ситиһиилэрин, бииргэ үлэлэһэр тэрилтэлэрин ааҕан ситиллибэт. Биир кылаас, салайааччы санныгар улахан үлэ сүктэриллибит. Ол эрээри, Надежда Афанасьевна сүктэриллибит диэни ылыммат: “Оҕолорум туохха барытыгар үөрүүнэн кытталлар, толлон турбаттар”, — диэн сэмээр үөрэрин биллэрэр. Оттон грант харчытын оскуолаларыгар көмө быһыытынан анаабыттар, туох сыалга тутталларын номнуо былааннаан олороллор.
Людмила ПОПОВА, “Саха сирэ” хаһыат, edersaas.ru