Тохсус кылаас үөрэнээччилэрэ бүгүн нуучча тылыгар кэпсэтэн көрүүгэ кыттыахтара
Үөрэҕи уонна науканы кэтээн көрөр федеральнай сулууспа бүгүн 9-с кылаас үөрэнээччилэригэр нуучча тылыгар түмүктүүр кэпсэтэн көрүүнү (собеседование) ыытыаҕа.
Түмүктүүр кэпсэтэн көрүү үөрэнээччилэр тылынан кэпсиир дьоҕурдарын бэрэбиэркэлиир сыаллаах Нуучча тылын уонна литэрэтиирэтин үөрэтии кэнсиэпсийэтэ олоххо киириитин иитинэн барар.
Санатан эттэххэ, бу быйылгыттан тохсус кылаас үөрэнээччилэригэр судаарыстыбаннай түмүктүүр аттестацияҕа (ГИА-9) киирэр быраабынан буолуоҕа.
Бүгүҥҥү боруобалаан көрүүгэ Арассыыйа 30 эрэгийиэниттэн 1,5 тыһ. үөрэнээччи кыттыаҕа. Ол иһигэр Саха сирин оҕолоро. Үлэни толорууга хас биирдии үөрэнээччигэ ортотунан 15 мүн. бэриллэр диэн Рособрнадзор саайтыгар суруллар. Кэпсэтэн көрөөччү түөрт сорудаҕы толоруоҕа: бэриллибит тиэкиһи доргуччу ааҕыы, эбии информацияны туһанан аахпыттан кэпсээһин, биир талан ылбыт тиэмэнэн монолог уонна кэпсэтэн көрүүнү тутар учууталы кытта диалог.
Быйылгы үөрэх сылыгар түмүктүүр кэпсэтэн көрүү (собеседование) сүрүн түһүмэҕин болдьоҕо – олунньу 13 күнэ, эбии түһүмэҕэ – кулун тутар 13 уонна ыам ыйын 6 күннэрэ.
Людмила ПОПОВА, “Саха сирэ” хаһыат, edersaas.ru