Саха сиригэр бу сыл ыам ыйыгар 913 оҕо күн сирин көрбүт: 472 уол уонна 441 кыыс. Тохсунньуттан 4397 оҕо төрөөбүтэ биллэр: 2284 уол уонна 2113 кыыс.
Ил Дархан Айсен Николаев иһитиннэрбитинэн, Саха сирэ Уһук Илиҥҥэ уонна дойду үрдүнэн даҕаны ылан көрдөххө, оҕо төрөөһүнүгэр инники күөҥҥэ сылдьар эбит. Бүтүн Арассыыйатааҕы биэрэпис барыллаан дааннайдарынан, эрэгийиэҥҥэ 996 тыһыынча киһи олороро биллибит. Ил Дархан быйыл Саха сиригэр 1 000 000 киһи баар буоларыгар эрэнэрин эттэ. «Бу — өрөспүүбүлүкэбит 100 сылыгар саамай үтүө бэлэх буолуо этэ», — диир Айсен Сергеевич.
ЗАГС Управлениетын дааннайдарынан, быйыл уолаттары Артем, Владимир, Лев, Максим, Александр, Марк, Матвей диэн таптаан ааттаабыттар эбит. Быйылгы эриэккэс ааттарынан Амор, Елисей, Ефим, Кантемир, Христофор диэн ааттар буолбуттар. Оттон кыргыттары Ева, София, Алина, Кира, Александра, Полина диэн элбэхтик ааттаабыттар. Аврора, Ангела, Афина, Вилиана, Дара, Мая, Милияна, Нея, Сарыала, Сырдыкчаана, Фэта, Элона, Юна диэн эриэккэс ааттарынан кыргыттарын сүрэхтээбиттэр эмиэ бааллар эбит.
Ил Дархан уонна Бырабыыталыстыба дьаһалтатын пресс-сулууспата.
СИА хаартыската.