Ахсынньы 19 күнүгэр Дьокуускай куорат дьаһалтатын баһылыга А.С.Николаев илии баттааһыннаах 333-с нүөмэрдээх уураах тахсыбыта. Онно олоҕуран, 2018 сыл тохсунньу 1 күнүттэн ыла төрөппүт уһуйааҥҥа төлөбүрэ үрдээтэ. Ити туһунан «Дьокуускай куорат» уокуругун үөрэххэ управлениетын саайтыгар суруллар.
Туһааннаах уураахха Дьокуускай куорат, Марха, Кангаласс микрооройуоннарын, Маҕан, Табаҕа, Хатас сэлиэнньэлэрин уонна Тулагы нэһилиэгин муниципальнай оҕо саадтарыгар төрөппүт төлөбүрэ (родительская плата) күҥҥэ 175 солк. тэҥнэһиэн туһунан ыйыллыбыт. Биирдэ аһыыр эрэсиимнээх кылгас кэмнээх (кратковременнай) бөлөхтөргө ыйыллыбыт кээмэйтэн 30 бырыһыан, иккитэ аһыыр эрэсиимнээхтэргэ 60 бырыһыан төлөнөр диэн суруллар.
Аны, балаҕан ыйын 18 күнүгэр, Дьокуускай куорат баһылыга оскуола иннинээҕи иитиллээччилэргэ 20 күннээх биир кэлим меню киирэрин туһунан уурааҕа тахсыбыта. Ити уураахха олоҕуран, тохсунньуттан ыла уһуйаан иитиллээччилэрэ саҥа менюнан аһыыллар. Ол курдук, олохтоох бэйэ аһылыга: чыыр, муксуун балыктар, ынах, убаһа этэ, уулаах отон уонна олохтоох хаһаайыстыбалар үүннэрбит (экологическай өттүнэн ыраас) оҕуруот аһа киириэҕэ.
Людмила ПОПОВА, “Саха сирэ” хаһыат, edersaas.ru