СӨ бырабыыталыстыбата 2019 сылга сорох социальнай төлөбүрдэри үрдэтэр (индексациялыыр) туһунан боппуруоһу сэтинньигэ көрбүтэ.
Үүнэр сыл тохсунньу 1 күнүттэн көрбөт инбэлииттэр биэнсийэлэрэ, социальнай босуобуйалар, тыыл бэтэрээннэригэр, реабилитацияламмыт дьоҥҥо, репрессиялартан эмсэҕэлээбит дьоҥҥо бэриллэр төлөбүрдэр, оҕо ыйдааҕы босуобуйата, социальнай айан билиэтин суумата, о.д.а. үрдүөхтээхтэр.
Ону тэҥэ 10-тан тахса оҕолоох дьиэ кэргэттэргэ тырааныспары атыылаһарга биирдэ бэриллэр төлөбүр суумата эмиэ үрдүөхтээх.
—“Саха Өрөспүүбүлүкэтигэр 2018-2022 сылларга гражданнарга социальнай өйөбүл” диэн судаарыстыбаннай бырагыраама чэрчитинэн, социальнай төлөбүрдэри, босуобуйалары индексациялыырга 150 мөлүйүөн солкуобай көрүлүннэ. Онон 200 тыһыынчаттан тахса киһи ылар босуобуйалара, төлөбүрдэрэ үрдүөҕэ. Хас биирдии төлөбүр үрдээһинин кээмэйэ араас буолар, ол эрээри, барыларыгар 4%-тан кырата суох үрдүөхтээх, — диэн үлэ, социальнай сайдыы миниистирэ Елена Волкова иһитиннэрдэ.
Ангелина Васильева, “Саха сирэ” хаһыат, edersaas.ru