Тохсунньунан биир кэлим эксээмэҥҥэ сайабылыанньаны ылан бүтэллэр. Быйыл биир кэлим эксээмэни (ЕГЭ) туттарааччылар олунньу 1 күнүн хойутаппакка сайабалыанньаларын биэрэллэрэ ирдэнэр.
Ханна биэрэбит? СӨ Үөрэҕин уонна наукатын министиэристибэтэ иһитиннэрэринэн, 11-с кылас үөрэнээччилэрэ үөрэнэр оскуолаларыгар; урукку сылларга бүтэрбиттэр уонна орто үөрэх устудьуоннара – муниципальнай үөрэх управлениеларын уорганнарыгар; олорор сирдэрин оскуолаларыгар; Саха сиригэр олорор эрээри, чопчу олорор миэстэтэ суох дьон (без определенного места жительства), кыһалҕаттан тэскилээччилэр (беженцы) – муниципальнай үөрэх управлениеларын уорганнарыгар.
Хас эксээмэни талабыт? Нуучча тыла уонна математика – булгуччулаах биридимиэттэр, балар аттестат ыларга наадалаахтар. Онтон атын биридимиэттэр үрдүк үөрэххэ туттарсар киһиэхэ ирдэнэллэр. Хас биридимиэти талары эксээмэн туттарааччы бэйэтэ билэр, маныаха хааччах суох. Ханнык үрдүк үөрэххэ, кини киириэн баҕарар идэтигэр ханнык эксээмэннэр (ЕГЭ) наадаларын саайтарыгар киирэн үөрэтэр булгуччулаах. “Арааһа, бу биридимиэт буолуо” эбэтэр “бу биридимиэт үһү” диэн таабырыннаабакка, чопчу ханнык биридимиэттэр ирдэнэллэрин көрөр ордук. Итиэннэ булгуччулаах биридимиэттэртэн ураты үс-түөрт эксээмэни талар табыгастаах дииллэр. Тоҕо диэтэххэ, олунньу 1 күнүн кэнниттэн биридимиэттэри талар, уларытар көҥүллэммэт, сайабылыанньаны ылбаттар, бааза сабыллар. Ханнык докумуоннар ирдэнэллэрин СӨ Үөрэҕин уонна наукатын министиэристибэтин саайтыгар киирэн көрүөххүтүн сөп.
Людмила ПОПОВА, “Саха сирэ” хаһыат, edersaas.ru
Хаартыска: kuban24.tv