Таһырдьа төһө да тохсунньу томороон тымныыта хойуу туманынан будулуйа турдар, чэбдик олоҕу өрө тутааччылар дьарыктарын тохтоппоттор. Ол курдук, Өймөкөөҥҥө сүүрүүктэр марафоҥҥа күрэстэстилэр, оттон Чурапчытааҕы “Чэбдик” кулууп чилиэннэрэ ойбоҥҥо чомполоннулар.
Тохсунньу 5 күнүгэр Өймөкөөҥҥө ыытыллыбыт норуоттар икки ардыларынааҕы бастакы марафоҥҥа сүүрүүнү сөбүлээччилэр биэс биэрэстэни бэдьэйдилэр, оттон марафонецтар бииртэн үс көскө диэри уһуннаах дистанцияларга бэйэлэрин тургутунан көрдүлэр. Куоталаһааччылартан саамай уһун сири – 38 килэмиэтири – Илья Пестерев сүүрдэ. Кини бириэмэтэ – 3 чаас 53 мүнүүтэ. Экстремал-марафонецтар сүүрүүлэрин бу кэмҥэ Өймөкөөҥҥө ыалдьыттаабыт Австрия, Япония, Таиланд итиэннэ Индия дьоно сөҕө-махтайа көрдүлэр, бииргэ хаартыскаҕа түһүстүлэр.
“Тымныы Полюһа – Өймөкөөн” уопсастыбаннай тэрилтэ бэрэссэдээтэлин солбуйааччы Сардаана Сыромятникова иһитиннэрбитинэн, сүүрүү буолар сарсыардатыгар 52 кыраадыс тымныы эбит.
Оттон Чурапчыга Афанасий Дорофеев тэрийбит «Чэбдик» кулууп чилиэннэрэ А.К. Софронов аатынын культурнай-спортивнай комплекс саалатыгар мустан, Саҥа 2019 сылы үөрүүлээх быһыыга-майгыга көрүстүлэр. Ыаллыы нэһилиэктэртэн, Тааттаттан, Мэҥэттэн, Дьокуускайтан тиийэ кэлбит доҕотторун кытта ойбоҥҥо киирэн чомполоннулар, тымныы уу эти-хааны чэбдигирдэрин итэҕэттилэр.
Роман ПОПОВ, «Саха сирэ» хаһыат, edersaas.ru
Хаартыска: интэриниэттэн ылылынна