Тохсунньу 13 күнэ – Арассыыйа Бэчээтин күнэ! Огдо оҕолорго суруйуутун биһирииллэр
Өрөспүүбүлүкэ үөрэнээччилэригэр аналлаах “Кэскил” -“Юность Севера” хаһыаттар кылаабынай эрэдээктэрдэрэ Евдокия Иринцеева-Огдо оҕолорго аналлаах кэпсээннэри, сэһэннэри, остуоруйалары суруйарынан киэҥник биллэр. Бу күннэргэ кини Арассыыйа Суруйааччыларын сойууһугар киирбитин туоһулуур дастабырыанньатын тутта.
Суруйааччылар кэккэлэрин хаҥаппытынан истиҥник эҕэрдэлээн уонна айымньылаах үлэҕэ алҕаан туран, Евдокия Иринцееваҕа дастабырыанньатын Саха сирин Суруйааччыларын сойууһун бэрэссэдээтэлэ, саха норуодунай бэйиэтэ Наталья Харлампьева туттарда.
“Аһаҕас Евразия-2015” норуоттар икки ардыларынааҕы литературнай куонкурус кыайыылааҕа Наталья Ивановна Харлампьева “Азия Хотун” кинигэтэ аан бастаан англия тылынан тахсыбытын 2016 сыл сэтинньигэ Лондоҥҥа сүрэхтээн кэлбитигэр, “норуодунай бэйиэт Наталья Харлампьева биир идэлээхтэригэр, эдэр суруйааччыларга суолу тэлээччи буолла…”, — диэбиппит.
Оттон быйыл, 2017 сыл сэтинньи бүтүүтэ, “Аһаҕас Евразия-2016” куонкурус Мария Шевель аатынан бириэмийэ “Оҕолорго аналлаах бастыҥ айымньылар” номинациятын кыайыылааҕа, саха суруйааччыта Евдокия Иринцеева-Огдо Швецияҕа, Стокгольм куоракка ыытыллыбыт “Аһаҕас Евразия-2017” VI норуоттар икки ардыларынааҕы литературнай фестиваль кэмигэр, английскайдыы тылынан тахсыбыт “Мамонтенок Мэник” кинигэтин биһирэмнээн кэллэ. Кинини кытта уола, идэтинэн английскай тыл учуутала, аспирант Александр Иринцеев тылбаасчыт быһыытынан уонна чугас дьоно барса сырыттылар. Алта киһилээх дьоҕус хамаанда омук сиригэр сахабыт дириҥ силистээх култууратын, үгэстэрин дьоһуннаахтык билиһиннэрдэ.
—Биһиэхэ кылаабынай эрэдээктэрбит Нина Иннокентьевна Протопопова, оҕолорго аналлаах кэпсээннэри, остуоруйалары, оҕо хаһыатыгар үлэлиир дьон эһиги суруйбатаххытына ким суруйуоҕай, диэн мэлдьи туруорсара, сүбэлиирэ. Ол да иһин, биһиги үгүспүт суруйар. “Бичик” кинигэ кыһата хас даҕаны кинигэбин таһаарда. “Мэник Сэлиичээн”— “Мамонтенок Мэник” 3D-кинигэ эмиэ кинилэр көҕүлээһиннэринэн айыллыбыта диэххэ сөп. Оттон быйыл кэлэктииппититтэн Миэль Юмшанова, Күннэй Еремеева (биһиэхэ үлэлиир кэмигэр) уонна Лилия Устинова үһүөн оҕолорго аналлаах бэртээхэй кинигэлэри таһаарбыттарыттан олус үөрэбит, — диир Евдокия Семеновна.
Биир идэлээхтэрбитигэр саҥа 2018 сылга айар үлэлэригэр саҥа ситиһиилэри баҕарыаҕыҥ.
Татьяна МАРКОВА, «Саха сирэ» хаhыат, edersaas.ru