Быйылгыттан “Земскэй учуутал” федеральнай бырагыраама үлэтин саҕалыыр. Өйүүҥҥүттэн, ол эбэтэр тохсунньу 10 күнүттэн, учууталлартан сайаапкалары ылыы саҕаланар.
Санатан эттэххэ, “Земскэй учуутал” федеральнай бырагыраама 2020-2022 сылларга үлэлиэҕэ. Бу кэрчик кэмҥэ Саха сиригэр барыллаан 50 квота көрүллүбүт. Итинтэн 19 вакансияҕа быйыл ылаллар. Уһук Илин уокуругар тустаах бырагыраамаҕа хапсыбыттар 2 мөл. солк., Арассыыйа онтон атын эрэгийиэннэригэр 1 мөл. солк. көрүллэр. Бырагыраама сүрүн соруга – оҕо ханна олороруттан тутулуга суох барыларын тэҥ хаачыстыбалаах үөрэҕинэн хааччыйыы.
Ахсынньы бүтүүтэ СӨ Үөрэҕин уонна наукатын министиэристибэтэ бырагыраамаҕа кыттар өрөспүүбүлүкэ 19 улууһун кытта видеонан мунньаҕы ыыппыта. Онно ханнык улуус хайа оскуолатыгар вакансиялар бааллара биллибитэ. Сиһилии СӨ Үөрэҕин уонна наукатын министиэристибэтин саайтыттан https://minobrnauki.sakha.gov.ru/ билсиэххитин сөп.
2020 сыл саҕаланыытыгар куонкуруска кыттар дьон 55-гэр диэри саастаах, 5 сыл устата үлэлииргэ бэлэм уонна I эбэтэр үрдүк категориялаах буолара ирдэнэр. Ону таһынан, үөрэтэр биридимиэтигэр, педагогикаҕа, психологияҕа учуонай истиэпэннээх, 10 сылтан итэҕэһэ суох педагогическай ыстаастаах, биир тэрилтэҕэ уһуннук үлэлээбитэ биһирэнэр диэн ыйыллыбыта.
“Земскэй учуутал” бырагыраама көрүллүүтүн бэрээдэгэ:
— Тохсунньу 10 — муус устар 15 күннэригэр вакансия бигэргэтиллибит испииһэгинэн “учуутал” дуоһунаһыгар сайаапканы хомуйуу;
— Муус устар 16-30 күннэригэр – бырагыраамаҕа кыттыахтаах дьону куонкуруһунан сүүмэрдээһин;
— Ыам ыйын 1-15 күннэригэр – кыайыылаахтар испииһэктэрин бигэргэтии;
— Ыам ыйын 16 – бэс ыйын 15 күннэригэр – куонкурус кыайыылаахтара үлэлэрин миэстэтин баран билсиилэрэ (миэстэтигэр тиийэн);
— Бэс ыйын 5 – от ыйын 20 күннэригэр – үс өрүттээх үлэ дуогабарын түһэрсии;
— Балаҕан ыйын 1 – ахсынньы 1 күннэригэр – төлөбүрү ыытыы уонна туттарыы.
Людмила ПОПОВА, “Саха сирэ” хаһыат, edersaas.ru
Мария ВАСИЛЬЕВА (СИА) хаартыскаҕа түһэриитэ.