«Точка кипения» ситим Дьокуускай олоҕун тупсарыа

Ааптар: 
Бөлөххө киир:

Балаҕан ыйын 7 күнүгэр Дьокуускайга ХИФУ гуманитарнай факультеттарын корпустарыгар «Точка кипения» диэн дьон толкуйун, бырайыагын өйүүр, сайыннарар, олоххо киллэрэргэ көмөлөһөр ситим арылынна.  

«Точка кипения» диэн тугуй?

«Точка кипения» диэн туох бырайыагай диир буоллахха, саҥа толкуйдаах, бырайыактаах дьоҥҥо лиэксийэ, форсайт-сессия, ырытыы нөҥүө үөрэтэр былаһаакка буолар. Манна экэниэмикэни уонна технология сайдыытын көҕүлүүр бырайыактарга сүрүн болҕомто ууруллуоҕа. «Точка кипения» 2014 сыллаахха Стратегическай көҕүлээһин ааҕыныстыбатынан тэриллибитэ. Ол саҕаттан 3,5 тыһ. тэрээһин ыытыллыбыт, 180 тыһ. киһи кыттыыны ылбыт. Дьокуускай «Точка кипения» бырайыакка 15-ис кыттааччы быһыытынан киирдэ. Ол курдук, ситим Москва, Санкт-Петербург, Иваново, Петрозаводск, Новосибирск, Владивосток, Хабаровск, Томск, Ульяновск, Челябинск, Обнинск, Липецк, Иркутск уонна Калуга куораттарга үлэлиир. 

Кимнээххэ аналлаах бырайыагый?

«Точка кипения» Саха сирин урбаанньыттарын, эдэр учуонайдарын, инженердарын, худуоһунньуктарын, дизайнердарын,уопсастыбыннай тэрилтэлэр бэрэстэбиитэллэрин, устудьуоннарын уо.д.а бырайыактарын олоххо киллэрэллэригэр көмө буолуоҕа. Маны таһынан, «Точка кипения» ситимҥэ ким баҕалппх бырайыагын кэпсээн, көмүскээн, көмө ылыан сөп.

«Точка кипенияҕа» кыттар туһугар тугу гыныахха нааданый?

«Точка кипения» кыттыылааҕа буолар туһугар leader-id.ru сайтка киирэн, регистрацияланан, бэйэн тускунан анкетаны толоруоххун наада. Регистрацияланнаххына  «Точка кипенияҕа» үлэлиир уонна санааҕын этэр бырааптанаҕын.

Владимир Солодов, СӨ бырабыыталыстыбатын бэрэссэдээтэлин эбээһиннэһин толорооччу:

— «Точка кипения» ситимҥэ араас эйгэ бастыҥнара бэйэлэрин толкуйдарын, санааларын, үчүгэй усулуобуйаҕа ырытан, үөрэтэн олоххо киллэрэллэригэр көмө буолуоҕа. Кинилэр санааларын «Точка кипения» атын куораттарыгар олорор дьону кытта үллэстэр, ырытыһар, сүбэлэһэр кыахтаныахтара. «Точка кипения» диэн кэскили түстүүр ситим. Бу ситим аныгылыы толкуйдаах дьоҥҥо олоҕу тупсарарга усулуобуйа оҥорор. Манна ким баҕарар кыттыыны ылыан сөп.

Андрей Силинг, Стратегическай көҕүлээһин ааҕыныстыбатын «Эдэр профессионаллар» хайысха дириэктэрин солбуйааччы:

 — Киһиэхэ олоҕу сайыннарар саҥа толкуй үөскээтэҕинэ, биир санаалааҕын кытта кэпсэтиһэр, ырытыһар күүстээх көмө буолар. Ол киһи эбэн-сабан, сүбэлээн биэрдэҕинэ киһи хараҕа арыллар. Саҥа толкуйдары олоххо киллэрэргэ усулйобуйа, инфраструктура наада. Ити боппуруостары «Точка кипения» быһаарар кыахтаах.

Сыл бүтүөр диэри «Точка кипения» Арассыыйа хас даҕаны куоратыгар арыллыаҕа. Санатан эттэххэ, Дьокуускайдааҕы «Точка кипения» Ленин уулуссатын 1 дьиэтигэр, иккис этээскэ баар.

Николай Попов, «Саха сирэ» хаһыат, edersaas.ru         

+1
0
+1
0
+1
0
+1
0
+1
0
+1
0
+1
0