СӨ Үөрэххэ уонна наукаҕа миниистирэ Владимир Егоров үөрүүлээх быһыыга-майгыга тоҕус оскуола, лицей дириэктэрдэригэр оптуобус күлүүстэрин туттартаата.
Кылгастык быһаардахха, Россиятааҕы Минпромторг уонна СӨ Үөрэххэ министиэристибэтэ сөбүлэҥ түһэрсиилэрин түмүгэр, быйыл Саха сиригэр уопсайа 46 оптуобус кэллэ. Бу бүтэһик баартыйа буолар. Миниистир күлүүстэри туттартыан иннинэ эҕэрдэтин тиэртэ. Итиэннэ кэнчээри ыччаттарбыт сайдалларын туһугар тиэхиньикэҕит уһуннук сулууспалаатын диэн баҕа санаатын тиэртэ.
СӨ Үөрэҕин сайдыытын хааччыйар киин дириэктэрэ Владимир Аржаков: “Быйыл көрүллүбүт 46 оптуобус уопсай суумата 54 мөл. солк тэҥнэһэр. Онтон 45 ГАЗ, 1 ПАЗ оптуобус. Транспорт барыта аныгы ирдэбилгэ толору эппиэттиир. Ону таһынан СӨ Үөрэххэ министиэристибэтэ “Көдьүүстээх үөрэх”, “Арктическай оскуолалар” диэн бырагырааматын чэрчитинэн 12 хотугу, арктическай барыйааннаах оптуобустары ылбыппыт. Бу автобустар 22 оройуоҥҥа тарҕаннылар. Олор истэригэр хоту улуустар эмиэ хабылыннылар. Тустаах бырагыраама икки сыл үлэлиэхтээх. Онон эһиил, үп-харчы көрүлүннэр, атын улуустары хааччыйар соруктаахпыт”, — диэн иһитиннэрдэ.
Өлүөхүмэ улууһун Үөрэххэ управлениетын материальнай-техническэй салаатын салайааччыта Юрий Улазов: “Билигин оҕону таһыыга ирдэбил кытаатан турар. Бары ирдэбилгэ эппиэттиир оптуобуһу көрбүттэрэ олус үчүгэй. Оҕолорбут сайдалларыгар улахан көмөлөөх буоларыгар эрэнэбит. Өлүөхүмэ улууһа киэҥ. Ыраах сытар нэһилиэктэр үөрэнээччилэрэ Өлүөхүмэ куоракка кэлэллэригэр элбэх уустугу көрсөллөр. Билигин тэрээһиннэргэ кэлэн кытталларыгар толору кыах үөскээтэ”, — диэн үөрүүтүн үллэһиннэ.Ыспыраапка:
Оптуобустар 11-12 миэстэлээх «ГАЗ» маркалаахтар. Бэдэрээссийэ бырагырааматынан Россия регионнарыгар барыта холбоон 1835 оптуобуһу түҥэттилэр. Бу сылга дойду үрдүнэн оскуола оптуобуһун ыларга анаан 3 млрд.солк.кэриҥэ үп көрүллүбүт.
Людмила ПОПОВА, “Саха сирэ” хаһыат, edersaas.ru