Бу элбэх киһи, ол иһигэр 2 саастаах оҕо өлүүлээх алдьархайдаах суол быһылаана 2017 сыл ахсынньы 8 күнүгэр Мэҥэ Хаҥалас улууһугар буолбута. Дьыала Мэҥэ Хаҥалас оройуоннааҕы суутугар көрүллэн бүтэн, бэҕэһээ бириигэбэр таҕыста.
Ол туһунан РФ Силиэстийэлиир кэмитиэтин Саха сиринээҕи управлениета уонна СӨ Борокуратууратын пресс-сулууспата иһитиннэрдилэр.
Суут быһаарбытынан, 2017 сыл ахсынньы 8 күнүгэр, киэһэ 20.00 чаас саҕана, Аллараа Бэстээх бөһүөлэгиттэн 16 км тэйиччи сиргэ, «Халыма» федеральнай суолга икки массыына харсыспыт. Ытык Күөлтэн айаннаан испит «КамАЗ» суоппара Төҥүлү бөһүөлэгин таһыгар фаралара умуллан хаалбыттарыгар (үлэлээбэт буолбуттарыгар) кыһаммакка, сүүскэ кэтиллэр «Эра» банаары панель үөһэтигэр ууран, салгыы айаннаабыт. Чааска 65 километр түргэннээхтик.
Суоппар суол ити быраабылатын куруубайдык кэһиитин түмүгэр, утары айаннаан испит «УАЗ» суоппара кинини ыраах турар дии санаан, утары суолга тахсан, харсыһыы буолбут. Ол түмүгэр, «уазик» салонугар баһаар буолбут…
Бу ынырык суол быһылааныгар 9 киһи, ол иһигэр 2 саастаах оҕо, суорума суолламмыттара, икки киһи доруобуйата ыараханнык эмсэҕэлээбитэ…
«КамАЗ» 56 саастаах суоппара буруйун билиммэтэҕин үрдүнэн, элбэх араас экспертиза ыытыллан, суут мунньаҕар буруйа толору дакаастанан, суут кинини РФ Холуобунай кодексатын 264-с ыст. 5-с чааһынан, ол эбэтэр, суол быраабылатын кэһии түмүгэр иккиттэн элбэх киһини өлүүгэ тиэрдиигэ буруйдааҕынан билинэн, 5 сыл 6 ыйга уопсай эрэсиимнээх холуонньаҕа көҥүлүн быһарга уурбут.
Маны таһынан, 2 сыл 6 ыйга массыына ыытар бырааба быһыллар итиэннэ эмсэҕэлээччилэргэ 2 мөл. 900 тыһ. солк. суумалаах моральнай хоромньуну төлүүр.
Бириигэбэр сокуоннай күүһүгэр киирэ илик, өрүттэр ааһыныахтарын сөп.
Биһиги корр., «Саха сирэ» хаһыат, edersaas.ru
Хаартыскалар: Якутск.ру уонна РФ СК Саха сиринээҕи управлениета.