Айылҕа харыстабыла

Тоҕус күн иһигэр 138 ойуур баһаара умуруорулунна

Атырдьах ыйын бастакы күннэригэр 138 ойуур баһаарын умуруорбуттар.

Чопчулаан эттэххэ, тоҕус күн иһигэр 104 421.4 га иэннээх сиринэн уопсайа 138 ойуур баһаара умуруоруллубут. Бу туһунан СӨ Экологияҕа, айылҕаны туһаныыга, ойуур хаһаайыстыбатыгар министиэристибэтэ иһитиннэрэр.
Өскөтүн, ааспыт нэдиэлэ саҥатыгар өрөспүүбүлүкэҕэ 100 ойуур баһаара баар эбит буоллаҕына, бүгүҥҥү күн туругунан 39 хаалбыт.
Бу уоту утары охсуһар күүһү-уоҕу улаатыннарыынан, күүстээх ардахтар түһүүлэринэн ситиһилиннэ. Федеральнай таһымнаах ыксаллаах быһыы-майгы эрэсиимэ биллэриллибитигэр, өрөспүүбүлүкэҕэ Хабаровскайтан, Бурятияттан, Забайкальеттан, Красноярскайтан Авиалесоохрана саппаас күүстэрэ көмөҕө кэлбиттэрэ. Маны сэргэ, уоту утары охсуһууга эрэгийиэннээҕи Авиалесоохрана, Якутлесресурс, ону таһынан РФ ЫБММ Саха сиринээҕи управлениетын, Быыһыыр уонна баһаары утары сулууспа үлэһиттэрэ бары күүстэрин-уохтарын ууран үлэлээтилэр.

Ойуур баһаара күүһүрбүт кэмигэр, уоту утары тыһыынчаттан тахса киһи сыраласпыта. Оттон бүгүн 689 киһи үлэлии сылдьар. Сүрүн күүстэр арыый уустук балаһыанньалаах Уус Маайаҕа бааллар. Итиннэ бүгүн сарсыардааҥҥы иһитинэриинэн 18 ойуур баһаара бэлиэтэммитэ. Баһаары умуруорууга 469 киһи, 10 тиэхиньикэ үлэлиир. Маны сэргэ, авиация көмөлөһөр.

Ойуур баһаардара арыый намыраабыттарынан, сорох оройуоннарга муниципальнай таһымнаах ыксаллаах быһыы-майгы эрэсиимэ сыыйа тохтотуллар. Ол курдук, кэнники күннэргэ ыксаллаах быһыы-майгы эрэсиимэ Мииринэй, Нерюнгри, Таатта оройуоннарыгар тохтотулунна«, — диэн иһитиннэрэр өрөспүүбүлүкэ сүрүн лесничэйэ Коноплев.

Оттон билиҥҥитэ ыксаллаах быһыы-майгы эрэсиимэ Алдан,Үөһээ Бүлүү, Ньурба, Орто Халыма, Уус Маайа оройуоннарыгар салҕанар. Мантан Орто Халымаҕа уонна Үөһээ Бүлүүгэ бу күннэргэ саҥа ойуур баһаара турбатаҕына, ыксаллаах быһыы-майгы эрэсиимэ тохтотуллуон сөп.

0
0
Telegram @edersaas20