«Хомусист-виртуоз мира» III норуоттар икки ардыларынааҕы күрэххэ икки күн устата 9 дойдуттан уонна Арассыыйа 11 эрэгийиэниттэн 38 кыттааччы күөн көрүстэ.
Бэс ыйын 17 күнүгэр Саха тыйаатырын сыанатыттан тоҕус хомусчут “Виртуоз хомусчуттар” кэккэлэрин хаҥаттылар. Бу иннинэ ааспыт икки «Хомусист-виртуоз мира» күрэхтэһиигэ «Виртуоз-хомусчут» аатын сүкпүттэр билигин аан дойду классиктарынан билиниллэр улуу маастардар. Ол курдук, 1991 сыллааҕы бастакы күрэххэ виртуоз аатын сүкпүттэр истэригэр Федора Гоголева, Петр Оготоев, Спиридон Шишигин бааллар.
2011 сыллааҕы иккис күрэххэ чулуу ааты-суолу сүкпүт Альбина Дягтярева, Дьүрүйээнэ, Ким Борисов (Саха сирэ), Миндигафур Зайнетдинов (Башкортостан), Айгуль Абышева (Кыргызстан), Лео Тадагава (Япония), Албин Паулус (Австрия), Вестад Свейн (Норвегия), Нептун Чапотин (Индия) – бары аан дойду араас муннуктарын хомус муусукатын билиҥҥи кэминээҕи сайдыытын туоһулара.
2022 сыл кыайыылаахтарынан Раджашекар Бимачар (Индия), Ма Гуо Гуо (Китай), Евгений Сарыглар (Тыва), Эркин Алексеев (Саха сирэ), Кутманаалы Султанбеков (Кыргызстан), Нарияна Ренанто (Саха сирэ), Фукико Гоукон (Япония), Варвара Степанова (Саха сирэ), Вольф Янша (Австрия) ааттаннылар. Саҥа виртуозтарга түөскэ иилинэр үрүҥ көмүс бэлиэ уонна 50 тыһ. солк. сэртипикээт туттарылынна.
Ону таһынан, анал номинацияларга бириис туттулар: «Өбүгэ үгэһинэн уһулуччу толоруу” номинацияҕа Бизьяа Хуухэндуу (Монголия), “Аныгы толоруу” — Ильдар Гимадиев (Татарстан, Арассыыйа), “Сыанаҕа уһулуччу толоруу” Алексей Чичаков (Алтай, Арассыыйа).
Мичил Яковлев хаартыскалара