Пионер, хомсомуол кэмэ үгэннээн турдаҕына, абааһы баарыгар соччо итэҕэйбэт үһүлэрэ, онтон сылтаан оннооҕор улахан мөккүөрдэр тахсыталыыллар эбит.
Биир оннук мөккүөр кэнниттэн Лариса диэн пионер кыыһы дьээбэлээн кылааһын уолаттара олус итэҕэйбэтэҕин, абааһы, иччи суох диэн кимиэхэ да иннин биэрбэккэ мөккүспүтүн иһин, түүн үөһэ халдьаайыга баар киһи уҥуоҕар тиийэн тоһоҕо саайарыгар соруйбуттар. Били мөккүспүт эрэ буолан онтон хотторумаары, куттаммытын биллэримээри, дьонуттан кистээн түүн үөһэ эргэ кылабыыһаҕа өтүйэлээх тиийбит. Тоҕо эрэ дьиэтигэр киниэхэ сөптөөх улахан тоһоҕо көстүбэтэх буоллаҕа. Кыысчаан төрөппүттэригэр эппэккэ эрэ түүн халтаҥ сонун кэтэн тахсыбыт. Кылабыыһаҕа тиийэн тоһоҕо саайар тыаһын кылааһын уолаттара тиэргэннэриттэн уу-чуумпуга истиэхтээхтэр эбит.
Кыыс иһигэр былыр үйэтээҕигэ өлбүт дьон көмүллэ сытар кылабыыларыттан төһө да дьиксиннэр, күһүҥҥү хараҥаҕа банаарынан сырдатынан үөһээ тахсыбыт. Оччолорго ити эргэ кылабыыһа күрүөлэммэккэ, нэһилиэктэн чугас соҕус томторго баара эбитэ үһү. Кырдьаҕастар кэпсээннэринэн, билигин ол уҥуохтар үксүлэрэ сиҥнэн, сири кытта тэҥнэһэн хаалаахтаабыттар да, дьон аньыыргаан ити эҥээринэн быһалыы суолу туппат эбит. Хорсун, пионер кыыс элбэх уҥуоҕу кэрийэ барбакка, биир бастакыга, эргэ аҕыраада баҕаната сиҥнэн сиргэ тимирэн эрэригэр кэлэн түүн үөһэ тоҥсуйааччы буолбут. Арыый кыратык тоҥсуйдум дуу дии санаан, аны уолаттар сарсын баайсан туруохтара диэн тохтоло суох тоҥсуйан тобугураппыт. Иһигэр уолаттар тоҥсуйбуппун иһиттилэр ини дии санаан баран дьиэлээри туран истэҕинэ, арай халтаҥ сонун тэллэҕиттэн ким эрэ тардыалыыр курдук эбит. Кыыс олус куттаммыт, били, тоһоҕолооҕо буоллар, алҕас сонум тэллэҕин хам тоһоҕолоотум диэҕин, кини кураанахтыы кэлэн тоҥсуйбутун өйдөөбүт. Ойон турбут, били хаһыс да сылын кэппит эргэ халтаҥ соно уоттуйа быһыытыйбыт буолан хайа ыстаммыт. Кыыс сонун тэллэҕин харбаабыттан төлө көтөн куотан иһэн иһиттэҕинэ, кэннигэр бүтэҥи, олус кырдьаҕас саҥа: “Сарсын тоһоҕолоох кэлээр…” — дии хаалбыт. Кыысчаан халдьаайыны хайдах түспүтүн өйдөөбөт, арай дьиэтигэр кэлэн биир кэм өтүйэтинэн ааны тоҥсуйа турара үһү.
Ити түүн кыысчаан көлөһүн аллан улаханнык ыалдьыбыт, нөҥүө сарсыарда тыына быстыбыт. Кэлин билбиттэрэ, кыысчаан саамай былыргы, хаһан эрэ отоһутунан аатыра сылдьыбыт оҕонньор уҥуоҕун кэлэн тоҥсуйбут эбит. Онон иччи, абааһы суох диир сатаммат диэн кэпсэтэллэрин оҕо сылдьан истибиттээҕим…