Тириэньэр Будимир Яковлев Дмитрий Коркин аатынан Судаарыстыбаннай бириэмийэ лауреата буолла
“Учууталым Дмитрий Петрович Коркин аатынан Cудаарыстыбаннай бириэмийэ лауреата буолбуппуттан долгуйдум, үөрдүм”, — диэн ССРС успуордун маастара, РСФСР, Саха Өрөспүүбүлүкэтин үтүөлээх тириэньэрэ, Ньурба улууһун бочуоттаах олохтооҕо Будимир Григорьевич Яковлев санаатын үллэһиннэ.
Саха сирин үгүс ситиһиилээх тустуугун иитэн-үөрэтэн таһаарбыт, олоҕун көҥүл тустууга анаабыт Будимир Григорьевич Яковлев успуорка, физическэй култуураҕа өҥөтүн иһин улуу тириэньэр Дмитрий Петрович Коркин аатынан Cудаарыстыбаннай бириэмийэ лауреата буолла.
“Мин 1971 сыллаахха Ньурба Антоновкатын оскуолатыгар ахсыс кылааһы бүтэрэн, тохсус-онус кылаастарга Дмитрий Петрович Коркиҥҥа эрчиллэ диэн Чурапчыга тиийбитим. Оскуоланы бүтэрэрбэр учууталым Украинаҕа эбэтэр Белоруссияҕа бар диэн сүбэлээн, Минскэйдээҕи физкультурнай институкка үөрэнэ барбытым. Тириэньэр быһыытынан 21 сааспар Намҥа үлэлээн саҕалаабытым, онтон ыла лоп бааччы 43 сыл ааһа охсубут эбит.
Дмитрий Петрович үөрэхпин бүтэрбиппин кэнниттэн туһуннара сатаабыта. Ол эрээри оччолорго балаһыанньа ыарахан этэ. Мин ыал аҕатабын, дьоммун иитиэхпин-аһатыахпын наада этэ. Онон тута тириэньэрдээбитим”, — диэн Будимир Григорьевич тириэньэр идэтигэр буһуутун-хатыытын туһунан ахтар.
«Дмитрий Петрович иитиллээччилэриттэн дисциплинаны, эрэсиими ирдиирэ. Бэйэтин үлэтигэр, идэтигэр олус бэриниилээх этэ. Кини элбэҕи ааҕара уонна биһигиттэн эмиэ ону ирдиирэ, саха, нуучча классиктарын айымньыларын аахтарара. Мин эмиэ уолаттарбыттан бу дьаһаллары ирдиибин. Бэрээдэк, сыаллаах-соруктаах дьарык ситиһиигэ тиэрдэр буоллаҕа», — диэн тириэньэр санаатын этэр.
Будимир Григорьевич үөрэнээччилэрин ахтан ааһыахха. Кини Арассыыйа успуордун үтүөлээх маастарын, Арассыыйа сүүмэрдэммит хамаандатын тириэньэрин, аан дойду призерун, Арассыыйа икки төгүллээх чөмпүйүөнүн, Аан дойду куубагын хаһаайынан, Арассыыйа үтүөлээх тириэньэрин, норуот дьокутаатын Петр Юмшановы, норуоттар икки ардыларынааҕы кылаастаах успуорт маастарын, икки Олимпиада кыттыылааҕын, устудьуоннарга аан дойду чөмпүйүөнүн, СӨ Успуорка миниистирин бастакы солбуйааччыны Леонид Спиридоновы, Белоруссия үтүөлээх маастарын, аан дойду чөмпүйэнээтин призерун, Аан дойду куубагын хаһаайынын Владислав Андреевы, Азия чөмпүйэнээтин үрүҥ көмүс призерун Семен Семеновы, Азия чөмпүйэнээтин боруонса призерун Иннокентий Иннокентьевы уо.д.а. ситиһии суолугар сирдээбитэ. Билигин туста сылдьар уолаттартан Герман Устиновы, Айаал Белолюбскайы кытта үлэлэһэр. Бу курдук улуу тириэньэр үөрэнээччитэ Будимир Григорьевич күн бүгүҥҥэ диэри үлэлии, сүүрэ-көтө сылдьар. Эдэр тустууктары дьарыктыыр, Успуорка бэлэмнээх буолуу киинигэр үлэлиир.
«Бүгүн бу манна учууталым Дмитрий Петрович Коркин аатынан Cудаарыстыбаннай бириэмиэйэ лауреата буолан турарбыттан олуһун долгуйдум уонна үөрдүм», — диэн Будимир Григорьевич Яковлев үөрүүтүн үллэстэр.
Айтана Аммосова, edersaas.ru
Хаартыскалар аһаҕас источниктартан туһанылыннылар:
ykt.ru, news.ykt.ru, sportyakutia.ru
Андрей Сорокин хаартыската.