Дьокуускайга бүгүн, Тимофей Сметанин аатынан уулуссаҕа, өйдөбүнньүк бэлиэ туруорулунна.
Гагарин уокуругар суруйааччы, бэйиэт, драматург, суруналыыс, Аҕа дойду сэриитин кыттыылааҕа Тимофей Егорович Сметанин аатынан уулусса саҕаланыытыгар өйдөбүнньүк бэлиэ туруорулунна диэн СИА иһитиннэрдэ. Санатан эттэххэ, 2019 сыл Кэбээйи улууһугар буойун-суруйааччы Тимофей Сметанин сылынан биллэриллибитэ. Үбүлүөйдээх сыл тэрээһинигэр Дьокуускай куорат Дууматын 2019 сыл сэтинньи 27 күнүгэр 425 №-дээх дьаһалынан Дьокуускай куорат биир уулуссатыгар Тимофей Сметанин аата иҥэриллибитэ.
«Аҕам аатын Дьокуускай куорат биир уулуссатыгар иҥэрбиккитигэр ис сүрэхпиттэн махталбын өрөспүүбүлүкэ салалтатыгар уонна Кэбээйи улууһун дьаһалтатыгар тиэрдэбин. Бу хаһан да умнуллубат үтүө өйдөбүл, улахан болҕомто. Дьиэ кэргэммит аатыттан доруобуйаны, этэҥҥэ буолууну, өрө көтөҕүллүүнү, дьиэ кэргэҥҥитигэр или-эйэни баҕарабын«, — диэтэ Тимофей Сметанин кыыһа Татьяна Сметанина.
Тимофей Сметанин айымньылара ааҕааччы, көрөөччү тапталын ылбыттара, саха литературатын көмүс пуондатыгар киллэриллибиттэрэ. «Егор Чээрин» сэһэнэ, «Лоокут уонна Ньургуhун» драмата, «Мэхээлэчээн булчут» кэпсээнэ, о.д.а. айымньылара болҕомтону улаханнык тардаллар. Кини саха норуотугар өлбөт-сүппэт кэрэ айымньылары бэлэхтээбитэ.
+1
+1
+1
+1
+1
+1
+1