Тимофей Иванов: “Дойду президенэ пандемия кэмигэр Госдуума оруолун бэлиэтээтэ”

Бүлүү улууһун Территориятааҕы быыбардыыр хамыыһыйатын бэрэссэдээтэлэ Тимофей Иванов быһа эпиир кэмигэр санаатын бу курдук үллэһиннэ:

— Дойду Президенэ эппитин курдук, коронавирустан быыһанар суол биир эрэ – хамсык дьаҥын утары быһыыны ылыы. Улууска хамсык дьаҥын утары быһыыны 5300 киһи ылбытын биллэрбиттэрэ. Элбэх киһи быһыыны ыллаҕына эрэ кутталлаах ыарыыны уодьуганныахпытын сөп.

Ол иһигэр быйылгы Госдума быыбара этэҥҥэ ааһарыгар быһыыны ылыы элбэҕи быһаарыа. Улахан быыбарга бэлэмнэнии быһыытынан биһиги улууска үлэлиир быыбар хамыыһыйаларын чилиэннэрэ быһыыны эрдэттэн ыла сылдьалларын ахтыахха сөп. Бүлүү улууһун Территориятааҕы быыбардыыр хамыыһыйатын чилиэннэрэ коронавируһу утары быһыыны бары ыллылар, учаастактааҕы быыбардыыр хамыыһыйалар чилиэннэрэ эмиэ үксүлэрэ ыллылар, ыла сылдьаллар.

Былырыын Төрүт Сокуоҥҥа – Конституцияҕа уларыыталары киллэриигэ куоластааһын Бүлүү улууһугар быыбар хамыыһыйалара, улуус, муниципальнай тэриллиилэр дьаһалталара тэрээһиннээхтик үлэлээбиттэрин түмүгэр ситиһиилээхтик ааспытын ахтыам этэ.

Арассыыйа Президенэ Владимир Путин коронавируһу утары охсуһуу кэлимник ыытылларын бэлиэтээтэ, билигин хамсык дьаҥынан ыалдьыбыт дьону чөлүгэр түһэриигэ үбүлээһин көрүллүө диэбитин элбэх киһи сэҥээрбит буолуохтаах.

Быыбарга сыһыаннаах ыйытыкка Владимир Путин Госдума ааспыт ыҥырыытын дьокутааттара үчүгэйдик үлэлээбиттэрин хайҕаата. Коронавирус пандемията турбут уустук кэмигэр Арассыыйа атын дойдулары кытта тэҥнээтэххэ улахан охсууну билбэккэ туораан эрэрин туһунан этиитин чорботуом этэ. Кини итиннэ Госдума таһымнаах үлэлээбитин бэлиэтээтэ.

Дойду олоҕор улахан оруоллаах Госдума быыбара Арассыыйаҕа, Саха сиригэр, Бүлүү улууһугар этэҥҥэ, сөптөөхтүк ааһыа, дьон санаатын биллэрэн куоластааһыҥҥа көхтөөхтүк кыттыа диэн эрэнэбин. Владимир Путин дойду олохтоохторун кытта 18-с быһа эпииригэр дьону долгутар элбэх боппуруоска сиһилии быһаарыы биэрбитин ахтыахха сөп.