Тимири кытта өрө мөҕүстүлэр

Ааптар: 
Бөлөххө киир:

Дьокуускайдааҕы 2 №-дээх оҕо спортивнай оскуолатыгар Учуутал күнүгэр ыччакка пауэрлифтиҥҥэ күрэхтэһии буолан ааста. Бу күрэхтэһии Бүтүн Россиятааҕы “Спорт вместе! По-настоящему!” бырайыак чэрчитинэн ыытылынна. Бастакы күн доруобуйаларыгар хааччахтаах спортсменнар күрэхтэстилэр. Оттон өрөбүлгэ 18-гар диэри саастаах уолаттар уонна ыччаттар илин-кэлин түһүстүлэр. Онон икки күн барыта сүүсчэкэ спортсмен тимири кытта өрө мөхсөн таҕыста. Күрэхтэһиигэ Намтан, Маҕантан уонна киин куорат спорка оскуолаларыттан эдэр спортсменнар кэлбиттэр.  

Билигин ханна даҕаны тренажернай саалалар дэлэйэннэр, ыччаттар бэйэлэрин быһыыларын-таһааларын тупсараары пауэрлифтининэн тус бэйэлэригэр анаан дьарыктаныылара үксээтэ. Бу кэрэхсэбиллээх. Салгыы эрчиллэн киирэн баран, аны кинилэр бэйэлэрин дьарыктарын тургутан, араас таһымнаах күрэхтэһиилэргэ холонон көрөллөрүн киһи эҕэрдэлии эрэ көрсөр. Онон, буолан ааспыт күрэхтэһиигэ бэйэлэриин саастыылаахтарыгар номнуо ситиһиилээх спортсменнары тэҥэ, саҥа саҕалааччылар эмиэ хото соҕустук кытыннылар.

Пауэрлифтинг күрэхтэһиитэ үс көрүҥтэн турар. Балаһыанньа быһыытынан, бастаан кыттааччылар штанганы санныларыгар уурунан баран, олорон баран туруохтаахтар, көнүөхтээхтэр. Иккис көрүҥ: сытан эрэн штанганы өрө анньыахтаахтар уонна бүтэһиккэ – штанганы сиртэн көтөҕөн таһаарыахтаахтар, систэрин көннөрүөхтээхтэр.

Күрэхтэһиигэ син балачча бэлэмнээх уолаттар кытыннылар. Өскөтүн бастакы уонна иккис көрүҥнэри эҥкилэ суох толорбут эбит буоллахтарына, сиртэн ыарахан штанганы көтөҕүү сорохторго кыаллыбата. Туох буолуой, элбэхтик эрчилиннэххэ, сыал-сорук туруоруннахха, кыайыыга дьулустахха инникитин ити кыаллар суол диэххэ сөп.

Инньэ гынан 18-гар саастаахтарга 59 киилэҕэ Намтан Дмитрий Олесов үс көрүҥ түмүгүнэн 297,5 кг ыараханы көтөҕөн, кыайыылааҕынан таҕыста. Ити курдук, 66 кг – Сергей Парчевскай (329,5 кг), 74 кг – Руслан Чиреев (477,5 кг) уонна 83 кг – Михаил Пельменев (515 кг) бастаатылар.

Күрэхтэһии кылаабынай судьуйатынан пауэрлифтиҥҥэ Россия спордун маастара Александра Мегежекская үлэлээтэ. Кыайыылаахтарга грамоталар, мэтээллэр, оттон муҥутуур кыайыылаахтарга кубоктар туттарылыннылар. Манна даҕатан эттэххэ, күрэхтэһиини тэрийэн ыытааччылар, Вера Петровна Душкевич салайааччылаах “Харысхал” уопсастыбаҕа махталларын эттилэр.

Дьокуускай 6 №-дээх спортивнай оскуолатын пауэрлифтиҥҥэ тренерэ Семен Румянцев:

-Бу күрэхтэһиигэ отучча иитиллээччим кытынна. Үлэлээбитим үс сыл буолла. Билиҥҥитэ кыра ситиһиилэр бааллар, ол курдук, Никита Данилин, Дьулус Горохов, Руслан Чиреев, Миша Пельменев – өрөспүүбүлүкэ күрэхтэһиитин кыайыылаахтара уонна призердара буолан, маастарга хандьыдаат нуорматын толордулар. Бу буолан ааспыт күрэхтэһиигэ даҕаны миэхэ эрчиллэр уолаттар ситиһиилээхтик кытыннылар.

Дьокуускайдааҕы 34 №-дээх анал коррекционнай оскуола пауэрлифтиҥҥэ тренерэ Юрий Ощепков:

Биһиги оскуолабытыттан бу аһаҕас күрэхтэһиигэ Россия уонна Уһук Илин ФУо күрэхтэһиитин призера Алексей Баев (59 кг), Женя Михайлов (48 кг), Владислав Стригов (59-тан үөһэ кг), Россия күрэхтэһиитин призера, Уһук Илин ФУо кыайыылааҕа Юлия Сидорова (52 кг), “Азия оҕолоро” оонньуу быйылгы кыайыылааҕа Карина Попова (53-тэн үөһэ кг), Кирилл Матвейчук (53 кг), “Азия оҕолоро” призердара Александр Каратаев (53-тэн үөһэ кг) уонна Светлана Воронянская (52 кг) бастаатылар. Оттон 11 саастаах Наташа Михайлова 48 киилэҕэ үһүс миэстэлэннэ уонна “Күрэхтэһии саамай эдэр кыттааччыта” диэн анал бирииһинэн наҕараадаланна.

+1
0
+1
0
+1
0
+1
0
+1
0
+1
0
+1
0