Аҕа дойду көмүскээччилэрин күннэригэр түбэһиннэрэн, бу күннэргэ «Куруһаала» эргиэн киинигэр быйыл Саха сирин тимир уустарын түмэр «ДАРХАН УУС» түһүлгэтэ 11-с төгүлүн ыытыллар.
edersaas.ru
Быйылгы быыстапка Саха Өрөспүүбүлүкэтин тимир уустарын сойууһун бэрэссэдээтэлэ, Духуобунас академиятын академига, П.А. Ойуунускай аатынан судаарыстыбаннай бириэмийэ лауреата Борис Неустроев-Мандар Уус 75 сааһын көрсө ыытыллар. Быыстапка күндү ыалдьыта Мандар Уус тэрээһин туһунан санаатын бу курдук үллэһиннэ:
— Саха киһитэ наһаа астынар, кута-сүрэ долгуйар күннэрэ. Миэхэ 75 сааспын туоларбынан маннык умнуллубат түгэни — Саха сирин тимир уустарын барыларын биир сиргэ түмэн, «Дархан уус» быыстапканы быйыл мин 75 сааспын туолар үбүлүөйбүнэн бэлэх ууммуттарыгар уолаттарбар ис сүрэхпиттэн махтанабын. Саха киһитигэр маннык дьол тиксэрэ олох аҕыйах. Оннук дьол-бырааһынньык күн миэхэ тигистэ. Тимир уһаарааччыларга ситиһиилэри баҕаран туран, миэхэ биир идэлээхтэрим ортотугар Дьол түгэнигэр сылдьыыбын бэлэхтээбиттэригэр махталбын тиэрдэбин. Саха тимир уустара Арассыыйаҕа эрэ буолбакка, аны аан дойду таһымыгар тахсарбытыгар эрэллээхпин!
Кэрэхсэбиллээҕэ баар — Мандар Уус бэйэтин үлэлэрин биир дойдулаахтара Баайаҕаттан быыстапкаҕа анаан аҕалбыттар.
«Дархан уус» быыстапкаҕа өрөспүүбүлүкэ араас улуустарыттан — хотуттан-соҕурууттан 77 тимир ууһа кэлэн кыттыыны ыла сылдьар.
«Куруһаала» иһэ — тобус-толору киһи! Тимир ууһа барыта «көһөн» кэлбит курдук. Көрөөччү, интэриэһиргээччи да элбэҕэ бэрт эбит.
Тэрийээччилэртэн биирдэстэрэ Бэчигэн Ньургун Миитэрэй Уола бэлиэтииринэн, духуобунас академига, өрөспүүбүлүкэтээҕи тимир уустарын сойууһун бэрэссэдээтэлэ Борис Неустроев-Мандар Уус 75 үбүлүөйдээх сааһын көрсө быйылы быһа араас суолталаах тэрээһиннэр ыытыллыахтара. Биир сүрүннэрэ — тимир уустара түмсүбүт сүрүн түһүлгэлэрэ «Дархан Уус» быыстапка ол тэрээһиннэри олунньу 22 күнүгэр үөрүүлээхтик аһан саҕалаата.
«Уус-уран оҥоһуулаах быһах», «Бастыҥ булт быһаҕа», «Бастыҥ ас быһаҕа» — бу маннык хайысхалаах күөн күрэскэ кыттаары үгүс тимир ууһа ох курдук анаан оҥостон кэлбит. Кэрэхсэбиллээҕэ баар, «Дархан уус» быыстапкаҕа кыттааччы — эдэриттэн эмэнигэр тиийэ. Ол курдук, Дьокуускай куорат 16-c оскуолатын сэттис кылааһын үөрэнээччитэ Дархан Габышевтан саҕалаан,
Таатта улууһун Тыараһа нэһилиэгин олохтооҕо, үс ыйынан 80 сааһын туолар Иван Слепцовка тиийэ кыттыыны ылаллар.
Тааттаттан сылдьар кырдьаҕас тимир ууһа быйыл быыстапкаҕа сэттис сылын кыттар буоллаҕына, бэйэтин баҕатынан тимир ууһугар уһуйулла сылдьар куорат оҕото бастакытын кыттар.
Саха эр дьоно аатырбыт түһүлгэтин «Дархан Уус» тимир уустарын дьоруойдарын салгыы анаан билиһиннэриэхпит.
Елена ПОТОЦКАЯ, «Саха сирэ» хаһыат», edersaas.ru
Хаартыскаҕа уонна видеоҕа ааптар түһэриитэ уонна устуута.