СӨ бырабыыталыстыбата “Арассыыйа тимир суоллара” хампаанньаны кытары кыһыҥҥы суол сабыллыан иннинэ таһаҕаһы аҕалыы туһунан кэпсэтиини ыытар. Манна, бастатан туран, бородууктаны уонна социальнай суолталаах табаары аҕалыы бастакы күөҥҥэ турар. Ол курдук, Кунцево-2 ыстаансыйаттан 70 контейнер, Москваттан 5 вагон кэлиэхтээх.
Бу иннинэ суһал ыстаап мунньаҕар өрөспүүбүлүкэҕэ таҕаһаҕы тиэйэр урбаанньыттар тимир суолга вагоннар тиийбэттэрин туһунан эппиттэрэ, бу кыһалҕаҕа көмөлөһөргө көрдөспүттэрэ. Онон бырабыыталыстыба “Арассыыйа тимир суоллара” хампаанньа генеральнай дириэктэрэ Олег Белозеровка сурук ыыттылар.
“Саха сирин тимир суоллара” хампаанньа дириэктэрэ Василий Шимохин этэринэн, таһаҕаһы да, пассажирдары да тиэйиигэ кыах баар. 2022 сыл бастакы 2 ыйдарыгар 1,4 туонна таһаҕаһы тиэйбиттэр. Бу былырыыҥҥы көрдөрүүнү кытары тэҥнээтэххэ, 41%-нан элбэх.
Сүрүннээн таас чоҕу тиэйэллэр, ол кээмэйэ – 539,6 тыһыынча туонна. Ньиэп бородуукталара – 78 тыһыынча туонна, бородуукта – 9,6 тыһыынча туонна, атын табаар – 36,6 тыһыынча туонна. Аллараа Бэстээх ыстаансыйатын нөҥүө барыта 219,9 тыһыынча туонна таһаҕас тиэйиллибит, бу былырыыҥҥы көрдөрүүттэн 26%-нан элбэх.
Ону тэҥэ, “Саха сирин тимир суоллара” пассажирдары Уһук Илин эрэгийиэннэригэр уонна Илиҥҥи Сибииргэ тиэрдэр диэн Тырааныспар суол-иис хаһаайыстыбатын министиэристибэтин пресс-сулууспата иһитиннэрэр.
Ангелина Васильева, “Саха сирэ” хаһыат, edersaas.ru