“РФ бырабыыталыстыбата тимир суолу сайыннарыыга үбүлээһини көрөргө бэлэм. Эһиил бу сыалга 1 трлн солкуобай барыаҕа. Оттон кэлэр үс сылга тимир суол сайдыытыгар 3 трлн солкуобай көрүллэрэ былааннанар. Бу эйгэҕэ маннык үбүлээһин өссө хаһан да көрүллэ илигэ”, – диэн иһитиннэрэр РФ Бырабыыталыстыбатын бэрэссэдээтэлэ Михаил Мишустин.
Билигин дойдубут үрдүнэн тимир суолу барытын кэриэтэ “Арассыыйатааҕы тимир суоллар” хампаанньа көрөн олорор. Бырабыыталыстыба бэҕэһээҥҥи мунньаҕар тимир суол сайдыытын, хампаанньа үлэтин-хамнаһын туһунан кэпсэттилэр.
Инникитин хампаанньа БАМ, Транссиб суолларын оҥорууга, Арктикаҕа, хоту дойдуга тимир суолу сайыннарыыга үлэлэһиэхтээх.
“Үгүөрү үбүлээһин көрүллэрин сэргэ манна былаан эмиэ улахан. Бастатан туран, дойдубут илиҥҥи өттүгэр БАМ, Транссиб курдук бырайыактары салгыы үлэлэтии, Арктикаҕа тырааныспар инфраструктуратын сайыннарыы курдук улахан үлэлэр күүтэллэр. Ону сэргэ сүрүн болҕомтобутун өрөмүөн үлэтигэр, муосталары, атын эбийиэктэри тутууга, састаабы саҥардыыга ууруохпут. Айанньыттар аныгы кэм сиэринэн тупсаҕай вагоннарга айанныахтаахтар. Уһун уонна кылгас айаныттан тутулуга суох барытыгар киириэхтээх”, – диэн бэлиэтиир премьер-миниистир.
Аграфена КУЗЬМИНА.
Андрей Сорокин (СИА) хаартыската.