Саха сиригэр тимир суол тутуутун боппуруоһа турбута 10-тан тахса сыл буолла. Бу күннэргэ Аллараа-Бэстээх-Магадаан туһаайыынан тимир суолу тутуу боппуруоһун тустаах исписэлиистэр олохтоохтук ылсан үөрэтэн эрэллэр.
Дьокуускай куоракка тимир суолу тутуу боппуруоһун ырытан баран, Москваттан кэлэ сылдьар Тырааныспар сайдыытын уонна экэниэмикэ институтун исписэлиистэрэ “Саха сирин тимир суоллара” акционернай хампаанньа салалтатын, СӨ тырааныспар министиэристибэтин эппиэттээх үлэһиттэрин кытта Өймөкөөн улууһун киинигэр Уус-Ньараҕа сылдьан аастылар. Биллэн турар, “Халыма” федеральнай суол устун айаннаан иһэн, эспэдииссийэ дьоно суолу-ииһи, нэһилиэнньэлээх пууннары үөрэттилэр.
Өймөкөөн улууһун баһылыга Иннокентий Сивцев эспэдьиисийэ кыттыылаахтарын кытта көрсүһэн баран, санаатын маннык үллэһиннэ:
— Беркакит-Томмот – Аллараа Бэстээх – Магадаан туһаайыынан барар тимир суол уһуна — 1,8 тыһыынча км. Эспэдиисийэ кыттыылаахтара Уус-Ньараҕа кэлэн, олохтоох дьаһалтаҕа улуус тэрилтэлэрин салайааччыларын, оройуон мунньаҕын дьокутааттарын уонна уопсастыбаннаһы кытта көрсөн, тимир суол ханан хайдах ааһарын билиһиннэрдилэр. Уопсайа сэттэ вариант дьүүлгэ сылдьар. Онтон иккитэ – Өймөкөөн улууһугар сыһыаннаах: Уус-Ньаранан барар дуу, Томторунан ааһар дуу диэн. Тимир суолу тутууга нэһилиэнньэлээх пуун – тимир суол ыстаансыйата 50 км буола-буола баар буолуохтаах эбит. Онон бакаа экэнэмиичэскэй суоттааһыныан Томтор нэһилиэгэ Уус-Ньаратааҕар ирдэбилгэ эппиэттиир курдук. Уус-Ньара ыраах сытара мэһэйдиир эрээри, инфраструктурата быдан ордук.
Быйылгы сыл бүтэһигэр эспэдиийсийэ кыттыылаахтара Магадаан уобалаһын сиһилии үөрэтэн баран, бүтэһиктээх быһаарыыны ылыахтара.
Елена ПОТОЦКАЯ, “Саха сирэ” хаһыат, edersaas.ru