Сунтаар Түбэй Дьаарханыттан төрүттээх Мария Данилова «Саха сирин суоллара» тимир суол хампаанньатыгар төрдүс сылын үлэлиир.
edersaas.ru
Тимир суол исписэлииһин тэхиньиичэскэй хайысхалаах үөрэххэ тардыһыыта өссө оскуолаҕа үөрэниэҕиттэн саҕаламмыт. Ол курдук, ахсыс кылааска диэри Түбэй Дьаархаҥҥа үөрэнэн баран, Мария Данилова билиитин кэҥэттээри 9-11 кылаастарга Сунтаардааҕы лицейгэ көспүт.
— Түбэй Дьаархаҥҥа ахсыс кылааһы 16 оҕо бүтэрбиппит. Математиканы, геометрияны, алгебраны, физиканы наһаа чиҥник үөрэппиттэрэ. Учууталым Антонина Васильевна Степанова кылааһым салайааччытынан сылдьан, олоххо үктэниибэр, үөрэхпэр болҕомтону уурарбар, ханнык идэни таба таларбар араас сүбэни-аманы биэрбитэ билигин да туһалыыр. Оттон лицейгэ Инна Владимировна Иванова математика учууталынан үлэлээбитэ. Кини үөрэнээччигэ чиҥ билиини биэрэр эмиэ олус ирдэбиллээх учууталынан биллэрэ, — диэн эдэр исписэлиис учууталларын махтана ахтар.
Мария Данилова Новосибирскайга Сибиирдээҕи тимир суол университетын бүтэрэн баран, Алданнааҕы ыстаансыйаҕа перевозка сулууспатын инженеринэн үлэлиир.
Үлэтин ыстаансыйа дьуһуурунайыттан саҕалаабыт. Сэһэргэһээччим кэлиҥҥи сылларга тимир суол үлэтигэр үгүс ыччат идэтийэн эрэрин бэлиэтиир.
— Саха ыччата ыстаансыйа дьуһуурунайынан, монтерунан, электромэхээнньигинэн үлэтин саҕалаан баран, салаа аайы сыыйа үрдээн иһэр. Идэни баһылыырга бастаан кыраттан саҕаланар. Ол курдук, ыстаансыйа дьуһуурунайыттан саҕалаан инженергэ, диспетчергэ тиийэ үөрэнэллэр. Сыыйа сулууспа начаалынньыгар тиийэ үрдүөххүн сөп. Тимир суол идэтэ улахан болҕомтону эрэйэр буолан, тырааныспар салааларынан араас идэни баһылыырга ирдэбиллээхтик үөрэтэллэр. Биһиги соҕуруу тиийэн үөрэммит буоллахпытына, билигин араас идэни баһылыырга анаан тутуллубут Аллараа Бэстээхтээҕи тырааныспар техникумугар үөрэниэххэ сөп. Тэрилтэбитигэр сахалар элбэхпит. Быйыл салалтам миэхэ Алдаҥҥа биир хостоох кыбартыыра биэрбитэ. Онон үлэлииргэ усулуобуйа барыта баар, — диэн кэпсиир Мария Данилова.
Ити курдук, АЯМ суолун устун баар тимир суолун ыстаансыйаларыгар барытыгар саха ыччата үлэлиир. Тырааныспар бу салаата өрөспүүбүлүкэбитигэр күүскэ сайдарыгар эрэл баар.
Елена ПОТОЦКАЯ, «Саха сирэ» хаһыат, edersaas.ru
Хаартыскаҕа ааптар түһэриитэ.