Булуҥ улууһун Тиксиитигэр «Култуура» национальнай бырайыак чэрчитинэн Саха сиригэр бастакы арктическай модельнай бибилэтиэкэ арылынна.
2019 с. «Култуура» национальнай бырайыак чэрчитинэн тэриллибит күрэскэ Тиксиитээҕи оҕо бибилэтиэкэтин филиала кыайан, тэрилтэ ис өттүн аныгылыы моһуонунан тэрийэр кыахтаммыта. Кыайыылаах бибилэтиэкэҕэ көмө кээмэйэ 5 мөлүйүөн солкуобайга тэҥнэстэ. Саҥа бибилэтиэкэ арыллыытыгар Саха сирин култууратын уонна духуобунай сайдыытын министрэ Юрий Куприянов видео-конференц сибээс нөҥүө кытынна.
— Дьаҥ ааһан, дьону кытта илэ алтыһыы сотору кэминэн сөргүтүллүө диэн эрэнэбит, оччоҕуна эһиэхэ хайаан даҕаны тиийиэхпит. Эһиэхэ балтараа тыһыынча араас саастаах бастайааннай ааҕааччы сылдьарын билэбит, ити олус үчүгэй. Национальнай бырайыак көмөтүнэн эһиги бибилэтиэкэҕит уонна Дьокуускай бибилэтиэкэтэ быйыл үбүлэннилэр. Бу киһини үөрдэр ситиһии. Өссө даҕаны бу бырайыакка кыттабыт, ол түмүгүнэн өссө үс бибилэтиэкэ эмиэ 5-тии мөлүйүөн солкуобайы сотору кэминэн ылыахтаах. Эһиги бибилэтиэкэҕэтигэр куруутун сырдык буоллун, ааҕааччы кэлэ турдун. Саҥа дьылга Култуура министиэристибэтиттэн кинигэлээх баһыылката күүтүҥ! — диэн миниистир эҕэрдэлээтэ.
Кыһыл лиэнтэни быһыы сиэрин-туомун Булуҥ оройуонун баһылыга Игорь Кудряшов уонна бибилэтиэкэ дириэктэрэ Айталина Иванова толордулар. Киирбит үбүнэн саҥа миэбэл, информационнай терминал, саҥа кинигэлэр атыылаһыллыбыттар. Саамай кыра ааҕааччыларга уонна кинилэр төрөппүттэригэр анаан дьиэ кэргэнинэн ааҕыы уонна сынньалаҥ хоһо арыллыбыт.
Маны сэргэ бибилэтиэкэ дириэктэрэ этэринэн, ааҕааччыларга типография өҥөлөрө оҥоһуллар буолуоҕа. Бэчээттээн таһаарыы, сканер өҥөлөрүн оҥорорго анаан тэриллэр атыылаһыллыбыттар.
Ил Дархан уонна бырабыыталыстыба пресс-сулууспата.