Өрөспүүбүлүкэбит киин улуустарыгар оптика утаҕа тиэрдилиннэ диир толору кыахтаахпыт. Аны билигин ыраах сытар оройуоннарга болҕомто ууруллар.
Бу күннэргэ СӨ инновацияҕа, цифровой сайдыыга уонна инфокоммуникационнай технологияларга миниистир Анатолий Семенов Instagraм-гар Булуҥ улууһугар Тиксиигэ түргэн интэриниэт 2025 сылга тиийэрин туһунан иһитиннэрдэ.
«Оробуочай сырыыбынан Москваҕа баарбын. Үлэм чэрчититинэн, “Морсвязьспутник» ФГУП дириэктэрэ Андрей Дмитриевич Куропятниковы кытта көрүстүм. Бу тэрилтэ «Полярный экспресс» Хотугу муора суолунан оптика утаҕын тардыыга, оҥорууга бырайыагы бэлэмниир оператор буолар», — диир кини.
Миниистир быһаарарынан саҥа систиэмэ 52-104 Тб/с аһарар кыамталаах оптика утаҕынан буолар уонна уопсай уһуна 12650 км. Бырайыак олоххо киирдэҕинэ, Мурманскайы, Владивостогу Европа-Азия икки ардыларыгар оптика сибээһинэн хааччыйыаҕа.
«Бырайыак олоххо киирэригэр интэриэспит улахан. Тоҕо диэтэххэ, саамай ыраах сытар Булуҥ улууһугар Тиксиини оптика утаҕар холбуур аартык аһыллар. Онон Тиксиигэ 2025 сылга түргэн интэриниэт тиийиэҕэ. Барыта этэҥҥэ буоллаҕына, ити ыйыллыбыт болдьохтон эрдэ тиийиэн эмиэ сөп», — диэн Анатолий Аскалонович быһаарар.