Тиксиигэ муора пуордун саҥардан оҥоруу хотугу таһыыны кытта ыкса сибээстээх.
Ил Дархан Айсен Николаев бэлиэтииринэн, «хотугу муоратааҕы суол оруола дойдуга сүҥкэн суолталанна. Онон Хотугу Муустаах акыйааҥҥа киирсэр Саха сирин арктическай сирэ-уота сайдыытыгар, сиртэн хостонор баайы баһылыырга бу сайдыыга туһуламмыт үлэ ыытыллара олус наадалаах».
Бырайыак чэрчитинэн, Тиксии пуордун кыраныыссата кэҥэтиллиэҕэ уонна Тиксииттэн 112 км тэйиччи турар Булуҥ улууһун Найба нэһилиэгэр муора терминала тутуллуоҕа. Бу иннинэ Саха сирин салалтата бырайыак экэнэмиичэскэй үбүлээһинигэр туһуламмыт инвестиция декларациятын көмүскээбитэ.
— Хотугу муоратааҕы суолунан 300 тыһыынча туонна таһаҕас тиэйиллэр. Онон Булуҥ улууһугар пуорт саҥардыллан, таһаҕаһы тиэйии ахсаана биллэ элбиэ, уматык, бородуукта сыаната быдан чэпчиэ этэ, — диэн бэлиэтиир транспорт уонна суол хаһаайыстыбыатын миниистирэ Владимир Сивцев.
Елена ПОТОЦКАЯ, «Саха сирэ» хаһыат.
Хаартыскаҕа Василий Кононов түһэриитэ.