Кулун тутар 14 күнүгэр Дьокуускайтан биэс киһилээх экстремал-хайыһардьыттар Улуу Кыайыы 75, Ийэ дойдуга бэриниилээх буолуу, Булуҥ улууһа төрүттэммитэ 90 үбүлүөйдээх сылларыгар анаммыт Дьокуускай-Дьааҥы-Тиксии хайысханан хайыһарынан айаннара саҕаламмыта.
edersaas.ru
Хайыһардьыттар кулун тутар 14 күнүгэр Дьокуускай Табаҕатыттан айаҥҥа туруммуттара. Былаан быһыытынан экстремал-спортсменнар айаннарын Тиксиигэ ыам ыйын 9 күнүгэр – Улуу Кыайыы 75 сылын бэлиэтээһин үөрүүлээх тэрээһинигэр кыттыыны ылан түмүктүөхтээхтэр. Эспэдииссийэ Уус Алдан, Томпо, Дьааҥы, Булуҥ улуустарынан хайыһарынан уопсайа 2500 км айанныыр соруктаах.
Хайыһардьыттар бөлөхтөрүн СӨ үөрэҕириитин туйгуна, СӨ физическэй култуураҕа туйгуна, Булуҥ улууһун бочуоттаах олохтооҕо Валерий Самойлов салайар.
Бөлөх настаабынньыга — норуот үөрэхтээһинин туйгуна, Саха сирин үөрэхтээһиҥҥэ тиһигин бочуоттаах бэтэрээнэ, РСФСР успуордун бэтэрээнэ, СӨ успуордун бэтэрээнэ Семен Шамаев. Бөлөх састаабар Иван Голиков (1968 с.т.), Максим Кириллин (1988 с.т.), Василий Самойлов (1989 с.т.) бааллар.
Эспэдииссийэ дьоно балааккаҕа таба тириитигэр хоно сылдьан, үс нэдиэлэ Дьааҥы үрдүк хайаларын хайыһарынан сылдьан туораатылар.
— Икки нэдиэлэ иһигэр Дьааҥы сис хайаларын туоруохпут дии санаабыппыт да, Тукулааҥҥа хаара олус хойуу этэ, тобуктан саҕалаан түөскэ диэри тиийэрэ.
Уонна үрэхтэр эриллэҕэс буолан, сорох сирдэрин быһа тутан, ойуур иһинэн хаампыппыт. Онон икки нэдиэлэ оннугар үс нэдиэлэ буоллубут.
Улаханнык томмокко хоннубут, айаннаан иһэн бултаатыбыт, балыктаатыбыт.
Бастаан утаа эбиэппитин уочаратынан астанар этибит. Лэппиэскэ кытта астанарбыт.
Кэлин бириэмэбит наһаа барар буолан, суухаралаах сылаас саахардаах чэйинэн сылдьыбыппыт. Сороҕор миин буһарынааччыбыт, — диэн кэпсиир эспэдииссийэ чилиэнэ Василий Самойлов.
Айанньыттар суолларын уочаратынан тэлэллэр эбит. Онон ноҕоруусканы этэҥҥэ аһардыбыттар.
Бу күннэргэ эспэдииссийэ чилиэннэрэ Дьааҥы Барылаһыгар тиийэн хонон аастылар. Онтон Дьааҥы улууһун нэһилиэктэринэн Эбээн Бытантай улууһугар тиийиэхтээхтэр.
Сартаҥынан Арыылаахха, онтон Верхоянскай куоратынан Баатаҕайга, онтон Эбээн-Бытантайга тиийиэхтээхтэр. Экстремал-спортсменнар айаннарын Тиксиигэ ыам ыйын 9 күнүгэр түмүктүөхтэрэ.
Елена ПОТОЦКАЯ, «Саха сирэ» хаһыат, edersaas.ru
Хаартыскаларга: Василий Самойлов түһэриитэ.