Урут Дьокуускай куоракка Стоматология поликлиникатыгар сарсыардаттан атах тостор уочараттар буолалларын өйдүүгүт? Сорохтор босхо толуоҥҥа тиксээри, түүн 3 чаастан кэлэн уочараттыыллара, сайыҥҥы өттүгэр хоноллоро даҕаны. Күҥҥэ бэрт аҕыйах толуон бэриллэр буолан, киин куоракка киһи тииһин босхо оҥорторботун кэриэтэ этэ. Төлөбүрдээх клиникаларга ыарахан сыанаҕа баран оҥорторор этибит.
Билигин хартыына уларыйбыт. Федор Попов уулуссатын 16-с №-гэр турар Стоматология поликлиникатыгар үлэ бириэмэтигэр хаһан баҕарар пааспардаах уонна ОМС полистаах тиийэн, суруйтарыахха уонна босхо эмтэтиэххэ сөп буолла.
Куоракка улахан дьон уонна оҕо стоматологическай поликлиникаларын холбоон, Дьокуускайдааҕы идэтийбит стоматологическай киини тэрийбиттэр. Онон оҥорор өҥөлөрө судургутуйбут, уларыйбыт. Гардероб, аптека, буфет үлэлиир, электроннай уочаратынан киирэҕин.
Хайдаҕын билээри, биир күн поликлиникаҕа эбиэт кэннэ тиийэ сырыттым. Киирээт да, регистратураҕа электроннай уочаратынан толуон ылаҕын. Сотору кэминэн регистратураҕа ыҥыраллар. Онтон бастакы стоматологическай көмөнү оҥорор кабинекка ыыталлар. Онно саҥаттан толуон ылар наадата суох, таблоҕа урукку толуонуҥ нүөмэрэ таҕыстаҕына, киирэҕин.
Регистратураҕа бэрт түргэнник ыҥырбыт буоллахтарына, бу кабинекка киирэргэр кэтэһэ түһэҕин. Холобур, мин биир чаас кэтэстим. Киирбитиҥ кэннэ, быраас тиискин барытын көрөн баран, хаһан, хайдах эмтэтэргин суруйан, анаан биэрэр. Тииһиҥ ыалдьан кэлбит буоллаҕына, сонно тута эмтиир.
Абыраллаах өҥө
Онон аныгыскыга кэлэргэр чопчу бириэмэтин билэн кэлэҕин. Баҕарар буоллаххына, дьиэҥ таһынааҕы чааһынай стоматология кабинетыгар суруйтарыаххын сөп. Бу кабинет булгуччулаах медицинскэй страховка бырагырааматыгар (ОМС) хапсар буолуохтаах.
Иккис тииһи оҥорорго биир-икки нэдиэлэ буолан баран, бириэмэтин ыйан туран, ыҥыраллар. Наада буоллаҕына, сонно тута атын кабинекка баран, рентгеҥҥэ түһүөххэ сөп. Онон ыксаабат киһи, аа-дьуо сылдьан, тииһин барытын босхо оҥорторуон сөп эбит. Быратыас оҥорор кабинет эмиэ баар.
Төлөбүрдээх стоматология клиникалара бас быстар сыаналаахтарын билэбит. Онон ордук элбэх оҕолоох дьиэ кэргэттэргэ, биэнсийэлээхтэргэ, кыаммат дьоҥҥо бу босхо өҥө абыраллаах буолсу.
Хайдах суруйтарабыт?
Регистратура сарсыарда сэттэ аҥаар чаастан киэһэ сэттэ аҥаарга диэри үлэлиир. Аныгы үйэҕэ дьиэҕиттэн тахсыбакка да эрэ, бырааска суруйтарыахха сөп. Ол курдук, er14.ru диэн сайт, судаарыстыбаннай өҥөнү оҥорор портал сайтын (gosuslugi.ru) уонна төлөпүөҥҥэ хачайдаммыт “Запись на прием к врачу РС(Я)” сыһыарыы нөҥүө суруйтарыахха сөп. Өрөбүл уонна бырааһынньык күннэригэр киин сарсыарда 9 чаастан күнүс 3 чааска диэри үлэлиир.
Стоматология киинин оҕо отделениета Ярославскай уулуссатын 6/3 баар. Манна оҕо тииһин эмтэтээри, эрдэттэн суруйтарарга төрөөбүтүн туһунан сибидиэтэлистибэтин, страховой медицинскэй полиһын, СНИЛС-ын илдьэ барыллар.
Киин төлөпүөннэрэ: 21-01-76, 701-713. Поярков уулуссатын 20/1 №-гэр баар филиалын төлөпүөнэ: 725-362. Оҕо отделениета: 42-22-56, 8-924-762-87-47.
Ангелина Васильева, «Саха сирэ» хаһыат, edersaas.ru
Хаартыскалар Интэриниэт ситимиттэн ылылыннылар.