Атырдьах ыйын 20 күнүгэр СӨ бырабыыталыстыбатын мунньаҕар 2020 сыл иккис кыбаарталыгар тиийинэн олоруу алын кээмэйин олохтоотулар.
edersaas.ru
Тиийинэн олоруу алын кээмэйин Судаарыстыбаннай статистика федеральнай сулууспа Саха сиринээҕи уорганын дааннайдарыгар олоҕуран оҥоһуллар. Онно 2020 сыл иккис кыбаарталыгар бородууктаҕа олохтоммут сыаналары ылан көрөллөр. Бу алын кээмэй араас босуобуйалары, төлөбүрдэри ааҕарга улахан суолталаах. Кыаммат араҥаҕа көмөлөһөр социальнай бырагыраамалары оҥорорго эмиэ тиийинэн олоруу алын кээмэйигэр тирэҕирэллэр.
Онон өрөспүүбүлүкэ үрдүнэн тиийинэн олоруу алын кээмэйэ 17 721 солкуобайга тэҥнэстэ. Үлэлиир дьоҥҥо – 18 728 солкуобай, биэнсийэлээхтэргэ – 14 215 солкуобай, оҕолорго – 18 559 солкуобай. Былырыыҥҥыны кытары тэҥнээн көрдөххө, ортотунан 3,5% үрдээбит.
Бастакы зонаҕа киирсэр улуустарга (Абыйга, Аллайыахаҕа, Булуҥҥа, Үөһээ Халымаҕа, Дьааҥыга, Өлөөҥҥө, Эдьигээҥҥэ, Муомаҕа, Аллараа Халымаҕа, Өймөкөөҥҥө, Орто Халымаҕа, Усуйаанаҕа, Эбээн-Бытантайга, Айхал бөһүөлэгэр, Удачнай куоракка): ортотунан 20 573 солкуобай, үлэһиттэргэ – 21 942 солкуобай, биэнсийэлээхтэргэ – 16 913 солкуобай, оҕолорго – 21 307 солкуобай.
Иккис зонаҕа (Алдаҥҥа, Аммаҕа, Үөһээ Бүлүүгэ, Бүлүүгэ, Горнайга, Кэбээйигэ, Ленскэйгэ, Мэҥэ Хаҥаласка, Мииринэйгэ, Намҥа, Нерюнгригэ, Ньурбаҕа, Өлүөхүмэҕэ, Сунтаарга, Тааттаҕа, Томпоҕо, Уус Алдаҥҥа, Уус Маайаҕа, Хаҥаласка, Чурапчыга, Дьокуускайга: ортотунан 17 386 солкуобай, үлэһиттэргэ – 18 366 солкуобай, биэнсийэлээхтэргэ – 13 884 солкуобай, оҕолорго – 18 222 солкуобай.
Ангелина Васильева, “Саха сирэ” хаһыат, edersaas.ru
Хаартыска: интэриниэттэн.