Араас санкциянан сибээстээн, доруобуйа харыстабылын эйгэтигэр, чуолаан тииһи эмтэниигэ туох уларыйыылар тахсыахтарын, ол иһигэр сыана төһө улаатыаҕын нэһилиэнньэ интэриэһиргиир.
Арассыыйа Доруобуйаҕа харыстабылын министиэристибэтин А.И.Евдокимов аатынан Москватааҕы судаарыстыбаннай мэдиссиинискэй-стоматологическай университет ректора, РНА академига Олег Янушевич сабаҕалааһына “Объясняем РФ” саайтка таҕыста.
» Судаарыстыбаннай килииникэлэргэ стоматология өҥөтө РФ Доруобуйа харыстабылын министиэристибэтэ бигэргэтэр тарибынан төлөнөр. Сорох өҥөлөр Булгуччулаах мэдиссиинискэй страховка суотугар оҥоһуллуохтарын сөп. Чааһынай килииникэлэргэ салалта бэйэтэ быһаарар. Кинилэргэ сыана 10–15% улаатыан сөп.
—Билигин тииһи урукку сыананан эмтэтээри, тиис бырааһыгар тиэтэйэр наада дуу, суох дуу?
— Уопсайынан, тиис бырааһыгар сылга иккитэ сырыттахха сөп. Бу икки сырыы икки ардыгар кариеһы уонна пародонтоһу эрдэтээҥҥи түһүмэхтэригэр быһаарыахха сөп. Онон, өскөтүн соторутааҕыта сылдьыбыт буоллаххына, стоматологка тиэтэйэр наадата суох.
— Тииһи эмтэнэргэ үбү-харчыны хайдах кэмчилиэххэ сөбүй?
Бириэмэтэ кэллэ дии санаатаххытына, стоматологка сырыт. Ыарыыны сэрэтии үбү-харчыны кэмчилииргэ көмөлөһөр. Тиис бырааһыгар сылдьаргын олох умнан кэбиспэтэххинэ, инникитин эмтэнэргэр оччонон аҕыйах харчыны барыаҥ.
— Стоматология эйгэтэ омук сириттэн матырыйааллары, үнүстүрүмүөннэри уонна эмтиир тэриллэри аҕалыыттан тутулуктаах дуо?
— Стоматологияҕа олус элбэх омук матырыйаала туһаныллар. Билиҥҥитэ стоматология эйгэтигэр үлэлиир арҕааҥҥы тэрилтэлэр 80-ча бырыһыаннара табаардарын Арассыыйаҕа биэрэллэригэр ханнык да хааччахтааһыны киллэрэ иликтэр.
1990-с сыллартан саҕалаан биһиги дойдубутугар омук тэрилин солбуйар систиэмэни сайыннараллар. Холобур, биһиги университеппытыгар билигин стоматология саҥа тэрилин оҥороллор. Ол – хирургия кыра эпэрээссийэлэрин оҥорор лазердаах роботизированнай комплекс. Ону сэргэ, стоматология матырыйаалларын улахан аҥаарын дойду хампаанньалара хайыы үйэ оҥороллор».
edersaas.ru