Тыа хаһаайыстыбатын министиэристибэтэ АПК үлэһиттэригэр «Бэс Чагда», «Чэбдик» уонна «Абырал» санаторийдарга чэпчэтиилээх путевкаларга сайабылыанньалары хомуйарын туһунан иһитиннэрэр.
«Абырал» санаторийга ис-үөс ыарыыларынан 17 путевка, «Чэбдиккэ» тыынар уорган ыарыыларынан 17 путевка, сүрэх-тымыр ыарыыларынан 17 путевка, «Бэс Чагдаҕа» уопсай чэбдигириигэ 40 путевка көрүллүбүт. Биир путевка 18 хонуктаах, сыаната ортотунан 10 216 – 10 722 солкуобай. Ол 80 %-ын министиэристибэ уйунар, ордугун тустаах киһи бэйэтэ төлүүр. Ирдэниллэр докумуоннар: пааспар, ИНН, СНИЛС уонна үлэ киниискэтин куоппуйалара, олорор сиртэн 070/у пуормалаах поликлиника ыспыраапката. Сайаапкалары уонна докумуоннары электроннай аадырыска: maksimova.AM@sakha.gov.ru ыытыллар, ким интэриэһиргээбит 8(4112) 50-66-63 төлөпүөнүнэн ыйыталаһыҥ.
Сайаапкалар 2021 сыл атырдьах ыйын 30 күнүгэр диэри хомуйуллаллар, сөмөлүөккэ билиэт төһө баарынан, уоппусканы ылыынан тутулуктанан, путевка кэмэ уларытыллыан сөп. Хотугу уонна арктическай улуустар олохтоохторугар кэлэ-бара айан ороскуота 100 % төлөнөр. Саха Өрөспүүбүлүкэтин Бырабыыталыстыбатын 2013 с. ахсынньы 5 күнүнээҕи ыйааҕынан, чэпчэтиилээх путевканан туһаналлар биэс сылтан итэҕэһэ суох ыстаастаах, маннык идэлээх үлэһиттэр: ыанньыксыт, массыынанан ыаһын оператора, сүөһүнү аһатааччы, пиэрмэ биригэдьиирэ, сылгыһыт, табаһыт, чуумсук, ыстаада биригэдьиирэ, таба зооветисписэлииһэ, сибиинньэ көрөөччү, кыылы иитээччи, булчут, балыксыт, астыыр сыах маастара, мэхэньисээтэр, массыына-тыраахтар пааркатын маастар-наладчига, агроном, бэтэринээр биэлсэр, зоотехник.
Санаторийга киирэргэ ирдэнэр: санаторнай-курортнай каарта, ИФА анаалыһа (иммуноглобулин G > 10, иммуноглобулин M < 2 ), COVID-19 ыарыһаҕы кытары хантаах суоҕун туһунан ыспараапка.
Раиса Сибирякова, «Саха сирэ», edersaas.ru