Сахавикипедия, «Саха сирэ» уонна «Кыым» хаһыаттар төрөөбүт тылбытын сайыннарар туһугар тиэрминнэри кытта үлэлэһэр анал хамыыһыйа тэриллэрин туруорсаллар. Тохсунньу 26 күнүгэр көҕүлүүр бөлөх Тыл сүбэтин хос бэрэссэдээтэлэ, үөрэх уонна наука миниистирин бастакы солбуйааччы Феодосия Габышеваны кытта көрсөн санаа атастастылар уонна министиэристибэ өйөбүлүн ыллылар.
Надежда Самсонова, «Саха сирэ» хаһыат, www.edersaas.ru
Көрсүһүүгэ Феодосия Габышева саҥа тэриллибит министиэристибэ боломуочуйатыгар тыл бэлиитикэтэ эмиэ киирэрин бэлиэтээтэ. Онон наука уонна үөрэх саҥа министиэристибэҕэ холбоспуттарын тоҕоостоохтук туһаннахха, сонуну киэҥник тарҕатар тэрилтэлэр өйөөтөхтөрүнэ, дьоһун үлэ тахсыаҕын туһунан биир санааҕа кэллилэр.
Хамыыһыйа сотору-сотору мустан күн аайы туттуллар тиэрминнэри үөрэтэн, ырытыһан, биир санааҕа кэлэн, этии быһыытынан министиэристибэҕэ киллэриэхтээх. Министиэристибэ сөбүлэһэн ылынар саҥа тылларын, өйдөбүллэрин бырабыыталыстыба уураҕынан бигэргэтиэхтээх. Оччоҕо сахатыйбыт тиэрминнэр булгуччулаахтык туттуллар тыл тиһигэр киирэн, ийэ тылбытын байытыахтара. Бигэргэммит тиэрминнэр кэлин тылдьыт буолан тахсыахтаахтар. Хамыыһыйаҕа тыл үөрэхтээхтэрэ уонна суруналыыстар киириэхтэрэ. Билигин хамыыһыйа балаһыанньата уонна састааба чуолкайданар.
Чокуур Гаврильев, «Саха сирэ» хаһыат сүрүн эрэдээктэрэ:
Былырыыҥҥыттан ыла «Сахалыы тиэрминнэр» диэн батсаап бөлөҕө тэринэн, сүбэлэһэн, хас нэдиэлэ аайы уонтан тахсалыы саҥа тиэрминнэри айан, хайысхаларынан аттаран «Саха сирэ» хаһыакка бэчээттиир буолан эрэбит. Биллэн турар, биһиги маны кимиэхэ да соҥнообоппут, этии эрэ бэрээдэгинэн, «баҕар, дьон-сэргэ ылыннаҕына, сөбүлээтэҕинэ, сыыйа туттар буолан барыа» диэн санаанан салайтарабыт.
Уопсайынан, “бу олус улахан суолталаах дьыаланы судаарыстыбаннай таһымҥа сүрүннүүр уолдьаста” дии саныыбын. Холобур, Арассыыйа састаабыгар киирэр атын өрөспүүбүлүкэлэргэ бу курдук тэриммиттэрэ-дьаһаммыттара ыраатта. Үтүө холобуру батыһыаҕыҥ.
«Сахамедиа” пресс-киинигэр ааспыт сыл сэтинньи 11 күнүгэр Саха тылыгар саҥа тиэрминнэри киллэрэр туһунан төгүрүк остуолу тэрийэн ыыппыппыт. Онно түмсүбүт дьон сахалыы тиэрминнэри оҥорон тарҕатыыга биир сүрүннүүр анал уорган тэриллэрэ наадатын туһунан бары биир санааҕа кэлбиппит. Өскөтүн, тиэрминнэри оҥоруу боппуруоһугар уопсастыбанньыктар, суруналыыстар, суруйааччылар, учуонайдар кыттыстахпытына, анал тиэрмин хамыыһыйатын тэрийдэхпитинэ, тылбыт сыыйа-баайа оннун булан иһиэ этэ.
“Саха тылыгар саҥа тиэрминнэри киллэрии” төгүрүк остуол видеота: