Тиэхиньикэни регистрациялааһын туһунан сокуоҥҥа уларыйыылар киирдилэр

Тохсунньу 1 күнүттэн тырааныспары регистрациялааһын туһунан сокуон күүһүгэр киирбитэ. Докумуон, чуолаан, Гостехнадзор эрэгийиэннээҕи салааларыгар тыраахтардары, тыа хаһаайыстыбатын массыыналарын, бырысыаптары уонна снегоходтары учуокка туруорар бырааптарын олохтуур.

Ол гынан баран, сокуоҥҥа тиэрмин бэйэтэ сиһилии арылла илик, онон бэйэтэ хаамар тэриллэри (самоходные) барытын кэриэтэ учуокка туруорарга дьаһайар. Холобур мотуордаах бэлисипиэти, оҕо оонньуур массыынатын, тэлгэһэ отун охсор массыыналары кытта учуокка туруорууну ирдиир курдук.

Сокуон ити итэҕэһин көннөрөр сыалтан Госдуума тырааныспары регистрациялааһын туһунан сокуоҥҥа көннөрүүлэри киллэрэргэ үлэ ыытта. Сокуон бырайыага маҥнайгы ааҕыытын ааста, оттон билигин туһанарга анаан бырабыыталыстыба уурааҕа таҕыста. 2021-26 сылларга тыраахтары уонна бэйэтэ хаамар тэриллэри регистрациялааһын туһунан уураахха бу тэриллэри эндэтэр өйдөбүлгэ толору быһаарыы бэрилиннэ.

Ол курдук, учуокка туруоруу эбээһинэһэ 50 куб. см. тахса кыамталаах, эбэтэр 4 кВт кыамталаах электрическэй уонна атын бэйэтэ хаамар тиэхиньикэҕэ эрэ тарҕанар. Бу өйдөбүлгэ тыраахтардар, коммунальнай эйгэҕэ уонна тыа хаһаайыстыбатыгар туһаныллар массыыналар, кинилэргэ холбонор бырысыаптар киирэллэр.

Өссө биир дьоһун уларыйыы “вездеход” тиэхиньикэ хаһаайыттарыгар сыһыаннаах. 16 сааһын туола илик киһиэхэ тыраахтары эбэтэр снегоходу регистрациялыыр бобуллар. Сокуоннай саастарын ситэ илик оҕолор тиэхиньикэни бас билэр да буоллахтарына, тэрили төрөппүттэрин эбэтэр эпиэкэлиир дьоннорун аатыгар эрэ учуокка туруоруоллуохтаах.

Урут сокуоннай саастарын ситэ илик оҕолор ааттарыгар тиэхиньикэни регистрациялаан, саахал тахсар  түгэнигэр административнай эппиэтинэстэн куотунуу түбэлтэлэрэ баар этэ, билигин итинник быһыы-майгы сүтүөхтээх.

Ону таһынан снегоходу эбэтэр тыраахтары билигин биир эрэ киһи аатыгар регистрациялыахха сөп. Өскөтүн докумуоннарынан тэрили хас да киһи кыттыгас бас билэр буоллахтарына, регистрациялыыр докумуон биир эрэ киһиэхэ суруллуохтаах. Бу миэрэ хонтуруол кытаатыннарыытын кытары сибээстээх: ханнык эмэ сокуону кэһии, оһол таҕыстаҕына, эппиэккэ тардыллар киһи аата биир буолуохтаах.

«Саха сирэ» хаһыат, edersaas.ru

Хаартыска Стелс хампааньа саайтыттан