Былырыын коронавирус дьаҥынан сибээстээн, оскуоланы бүтэрээччилэр тиһэх чуорааннара итиэннэ оскуоланы бүтэрэр үөрүүлээх тэрээһиннэрэ онлайн көрүҥүнэн ыытыллыбыта. Бүгүн бу тэрээһиннэри эмиэ онлайн көрүҥүнэн ыытар туһунан Дьокуускай куорат үөрэҕин управлениетын бирикээһэ таҕыста.
Бирикээскэ ыйылларынан, ыам ыйын 26 күнүгэр үөрэхтэригэр, спорка, айар үлэҕэ ситиһиилээх үөрэнээччилэргэ куораттааҕы “Тиһэх чуораан-2021” тэрээһини онлайн көрүҥүнэн ыыталларыгар сорудахтаммыт.
Тиһэх чуорааны уонна оскуоланы бүтэрэр үөрүүлээх тэрээһини онлайн көрүҥүнэн тэрийэн ыыталларыгар оскуола салайааччыларыгар туһаайыллыбыт.
Төрөппүттэр оскуоланы бүтэрэр былааннаммыт маассабай, барар-кэлэр (выездные) тэрээһиннэри тохтотоллоругар сүбэлииргэ диэн этиллибит.
Бирикээс бүгүн, ыам ыйын 13 күнүгэр, тахсыбыт. Онон уон биир сылы быһа үөрэммит оҕолор үйэҕэ биирдэ ыытыллар бырааһынньыктарыттан “ытыс соттоллоругар” тиийбиттэр. Бирикээһи ыйыллыбыт сигэнэн http://yaguo.ru/node/9983 киирэн көрүөххүтүн сөп.
Людмила ПОПОВА, «Саха сирэ» хаһыат, edersaas.ru
Хаартыска: https://sib.fm/news/2020/05/25/poslednij-zvonok-2020-kartinki-stihi-pozdravleniya-dlya-vypusknikov