ТХМ Уопсастыбаннай сэбиэтин боломуочуйата 3 сылга диэри уһатылынна
Бэҕэһээ, ахсынньы 26 күнүгэр, Тыа хаһаайыстыбатын уонна ас-үөл бэлиитикэтин министиэристибэтигэр Уопсастыбаннай сэбиэт чилиэннэрэ мустаннар, састааптарын, Уопсастыбаннай сэбиэт туһунан балаһыанньа барылын уонна кэлэр сылга үлэлиэхтээх былааннарын торумун дьүүллэһэн бигэргэттилэр. edersaas.ru
Санатан эттэххэ, министиэристибэ иһинэн Уопсастыбаннай сэбиэт аан маҥнай 2012 сыл муус устар 25 күнүгэр министиэристибэ бирикээһигэр олоҕуран тэриллибитэ. Сэбиэт састааба, балаһыанньаҕа сөп түбэһиннэрэн, икки сыл кэнниттэн сөргүтүллүбүтэ. Аны билигин Уопсастыбаннай сэбиэти үһүстээн саҥардыы болдьоҕо туолбутунан (өссө аһара барбытынан), бырабыыталыстыба бэрэссэдээтэлин бастакы солбуйааччы-тыа хаһаайыстыбатын уонна ас-үөл бэлиитикэтин миниистирэ Петр Алексеев кыттыылаах мунньах икки өттүттэн санааны үллэстии, сүбэлэһии киэбинэн ыытылынна.
Уопсастыбаннай сэбиэт туһааннаах министиэристибэни уопсастыбаннай холбоһуктары кытта ситимниир, сүбэлиир уонна сүбэлэһэр уорган буолар. Сэбиэт сүрүн соруга – министиэристибэ тыа хаһаайыстыбатын уонна ас-үөл бэлиитикэтигэр итиэннэ тыа хаһаайыстыбатын бородууксуйатын, сырьетун уонна аһын-үөлүн ырыынактарын сүрүннээһиҥҥэ көдьүүстээх дьаһаллары ыларын хааччыйар этиилэри бэлэмнииригэр көмөлөһүү. Туруоруммут сыалын-соругун ситиһэр инниттэн дьону, уопсастыбаннай холбоһуктары судаарыстыба бэлиитикэтин олоххо киллэриигэ түмэ тардар, ТХМ оҥорор нуорма-быраап акталарыгар коррупцияны утары тутулуга суох экспертизаны ыытар, министиэристибэ судаарыстыбаннай өҥөнү толоруутун хонтуруоллааһыҥҥа кыттар, уопсастыбаннай холбоһуктар көҕүлээһиннэрин көрөр, ТХМ үлэтин туһунан дьоҥҥо тиэрдиигэ уонна дьүүллэһиигэ кыттар, дьон санаатын ырытан-түмэн министиэристибэ билиитигэр тириэрдэр, уопсастыбаннай хонтуруолга кыттар боломуочуйалардаах.
Балаһыанньаҕа ыйылларынан, 11 киһиттэн турар Уопсастыбаннай сэбиэт састаабын министиэристибэ өрөспүүбүлүкэ Уопсастыбаннай палаататын кытта сүүмэрдииллэр. Сэбиэт састааба министиэристибэ бирикээһинэн бигэргэтиллэр. Ол эрээри, бэрээдэк быһыытынан, миниистир сэбиэт састаабын 75 бырыһыанын аныыр, онтон ордубут 25 бырыһыаҥҥа куонкурус биллэриллэр. Сэбиэккэ былаастан тутулуга суох Уопсастыбаннай палаата чилиэнэ баар буолуохтаах. Судаарыстыбаннай, муниципальнай сулууспалаахтар, дьокутааттар чилиэн буолбаттар. Сэбиэт бэрэссэдээтэлэ, кини солбуйааччыта уонна сэкирэтээр састаап иһиттэн талыллаллар.
Уопсастыбаннай сэбиэт чилиэннэрэ бырабыыталыстыба бэрэссэдээтэлин бастакы солбуйааччы-тыа хаһаайыстыбатын уонна ас-үөл бэлиитикэтин миниистирэ Петр Алексеевтыын сүбэлэһэн баран, үһүс болдьоххо сүнньүнэн урукку састаабы оннунан хаалларарга уонна боломуочуйа болдьоҕун 3 сылга диэри уһатарга быһаардылар. Сэбиэт састаабыгар Уопсастыбаннай палаата чилиэнэ, “Тумул” ХЭУо дириэктэрэ Таисия Десяткина, “Бөртө сылгы собуота” ХЭУо дириэктэрэ Александр Павлов, тыа хаһаайыстыбатын миниистиринэн үлэлии сылдьыбыт ытык киһи Прокопий Иванов, СӨ Астыыр-үөллүүр тэрилтэлэрин ассоциациятын бэрэссэдээтэлэ Розаида Гудуева, АККОР эдэр фермердэрин сэбиэтин бэрэссэдээтэлэ Александр Фомин, о.д.а. бааллар. Сэбиэт чилиэннэрэ бэрэссэдээтэлинэн ТХНЧИ дириэктэрин, тыа хаһаайыстыбатын наукатын дуоктарын Айаал Степановы, сэкирэтээринэн “Саха сирэ” хаһыат ырытааччытын Василий Никифоровы таллылар.
Василий НИКИФОРОВ, «Саха сирэ» хаһыат, edersaas.ru