Тыа хаһаайыстыбатын уонна ас-үөл бэлиитикэтин министиэристибэтин иһинэн иллэрээ сыл муус устар ыйга 10 киһилээх Уопсастыбаннай сэбиэт сүүмэрдэнэн турар. Бэрэссэдээтэлинэн Тыа хаһаайыстыбатын научнай-чинчийэр институтун дириэктэрэ, тыа хаһаайыстыбатын наукатын дуоктара Айаал Степанов талыллыбыта.
Василий НИКИФОРОВ, «Саха сирэ» хаһыат, edersaas.ru
Уопсастыбаннай сэбиэккэ тыа хаһаайыстыбатын производственнай уонна потребительскай кэпэрэтииптэрин, бааһынай хаһаайыстыбалар, соҕотуопкалыыр, астыыр тэрилтэлэр салайааччылара, уопсастыбаннай түмсүүлэр уонна киэҥник иһитиннэрэр-биллэрэр тэриллиилэр бэрэстэбиитэллэрэ бааллар. Кинилэр ити кэм устатыгар бэйэлэрин хайысхаларынан, тустаах үлэлэринэн өрөспүүбүлүкэ тыатын хаһаайыстыбатын сайыннарыыга туһуламмыт сокуон барылыгар этиилэрин киллэрэн, дьүүллэһиигэ көхтөөхтүк кытыннылар.
Уопсастыбаннай сэбиэт былааһы норуоттуун ситимниир, ол эбэтэр аграрнай бэлиитикэни дьоҥҥо-сэргэҕэ тиэрдэр, быһаарар, аллараттан үлэ дьонун санаатын, туох кыһалҕалааҕын салалтаҕа иһитиннэрэр аналлаах. Айаал Иванович этэринэн, билигин саҥа сокуон олоххо толору кыаҕынан үлэлиирин хааччыйарга, хос нуорма-быраап акталарыгар этиилэри, сүбэлээһиннэри киллэрэргэ, уопсастыбаннай хонтуруолу олохтуурга тоҕоостоох кэм. Онон, мантан инньэ Уопсастыбаннай сэбиэт састаабын саҥалыы сааһыланан, күүһүрдэн, үлэлииргэ бэлэм. Бу күннэргэ сэбиэт чилиэннэрэ мунньахха сүбэлэһэн баран, министиэристибэ саҥа салалтатын санаатын истэргэ, сыллааҕы үлэлэрин былаанын торумнуурга быһаардылар.
Василий НИКИФОРОВ, «Саха сирэ» хаһыат, edersaas.ru