Соторутааҕыта А.Е.Кулаковскай аатынан норуоттар доҕордоһууларын дьиэтигэр Саҥа дьыл чугаһаабытынан, олус сэргэх кэнсиэр буолла. Өрөспүүбүлүкэҕэ киэҥник биллэр «Тетрис» үҥкүү ансаамбыла бырааһынньы тыынын аҕалла диэн Татьяна Матюшенко уонна Тамара Савочкина иһитиннэрэллэр.
—Бырааһынньыкка анаммыт бырагыраама «Цвет настроения – Новогодний» диэн аатынан салаллан барбыта дьону-сэргэни, ордук оҕо-аймаҕы улаханнык үөртэ, сонурҕатта. Кэнсиэр үҥкүүлээх-битиилээх, өссө остуоруйа дьоруойдардаах буолан ураты буолла. Тымныы оҕонньор, Хаарчаана, Муус королева, үтүө санаалаах фея, үүнэр сыл бэлиэтинэн — кутуйахтар хоруоллара, о.д.а. бааллар.
Тэтимнээх үҥкүүнү сэргэ, оонньуу-көр, остуоруйаҕа ыалдьыттааһын оҕо-аймаҕы үөртэ-көтүттэ. Бэртээхэй кэнсиэргэ СӨ судаарыстыбаннай филармониятын, «Русь» ырыа ансаамбылын солиһа Алексей Солдатов, СӨ култууратын үтүөлээх үлэһитэ Юта Асекритова кыттан, тэрээһини ситэрэн-хоторон биэрдилэр. Муус королеваны СӨ култууратын үтүөлээх үлэһитэ, үөрэҕирии туйгуна Тамара Савочкина чаҕылхайдык толордо. Остуоруйалар сүрүн дьоруойдарын оруолларыгар «Тетрис» ансаамбыл хореографтара уонна кэлэктиип оҕолоро табыллан оонньоотулар.
Көрөөччүлэр кэнсиэр саҕаланыаҕыттан ытыстарын тыаһын харыстаабатылар. Дьоро киэһээҕэ кыайан сылдьыбатахтар «Саха» НКИХ ханаалынан, бырааһынньыктар күннэригэр, бу кэнсиэри көрүөххүтүн сөп диэн иһитиннэрэллэр. Маныаха биэрии хаһан көстөрүн Instagram @tetris_ykt чопчулуоххутун сөп.