Бүгүн, сэтинньи 27 күнүгэр, «Саха» НКИХ «Тэтим-Саха араадьыйата» тэрилтэ историятыгар аныгы үйэҕэ сонун сүүрээни киллэрбит үөрүүлээх күнэ.
2020 сылга Саха араадьыйатын 90 сыллаах өрөгөйдөөх үбүлүөйүн бэлиэтиэҕэ. Бу суолталаах бэлиэ сылга анаан «Саха» НКИХ көһө сылдьар устуудьуйата Нам улууһугар үлэтин саҕалаата.
«Тэтим-Саха араадьыйатын» дириэктэрэ Николай Бястинов иһитиннэрбитинэн, бу күн саҥа аһыллыбыт улуустааҕы IT-кииҥҥэ 21 киһилээх бөлөх сарсыарда алта чаастан үлэлии олорор.
— Көһө сылдьар устуудьуйа өрөспүүбүлүкэ улуустарыгар тиийэн үлэлээһинин биһиги Саха араадьыйатын 90 сылын көрсө тэрийэн ыытабыт. Маннык көһө сылдьан улуустарынан үлэлээһини ый аайы тэрийиэхпит. Нам улууһун бастакынан талыыбыт төрүөтэ үгүс. Бастатан туран, эһиил Нам улууһа тэриллибитэ эмиэ 90 үбүлүөйдээх сылын бэлиэтиэҕэ. Иккиһинэн, Саха сирин судаарыстыбаннаһын төрүттэспит, Саха араадьыйата тэриллиитигэр бастакы олугу уурбут Максим Аммосов төрөөбүт дойдута. Үсүһүнэн, Нам улууһун ааттаах-суоллаах дьоно өрөспүүбүлүкэбит социальнай-экэнэмиичэскэй сайдыытыгар сүҥкэн кылааттарбыт киллэрбит үтүө өҥөлөөхтөр. Ол курдук, биһиги аксакалбыт, Саха араадьыйатын бэтэрээнэ, «легендата» Афанасий Готовцев Нам улууһуттан төрүттээх. Бастакы саҕалааһыммытын дьон-сэргэ сэргээтэ. Онон бастакы хараҥаччыбыт этэҥҥэ эпииргэ көттө, — диэн Саха араадьыйатын дириэктэрэ Николай Бястинов санаатын үллэһиннэ.
Бүгүн күнү быһа араадьыйа ыытааччылара Гея Буртахова, Эдуард Рудых, Ахтылҕан Петрович, Амор, Светлана Попова, Туйаара Андреева, Баһылай Посельскай, Эрэл Эрилик уонна Николай Бястинов «Эрдэһиттэр» биэрииттэн саҕалаан, «Үтүө күнүнэн, Сахам сирэ», «Кэпсээҥҥит, хайдах олороҕут?», «Инники күөҥҥэ», «Тэтим чааһа», «Тыыннаах дорҕоон» биэриилэргэ Нам улууһун олоҕун, интэриэһинэй дьарыктаах дьонун, үлэтин-хамнаһын, ситиһиилэрин туһунан быһа эпииргэ кэпсиэхтэрэ.
Онон, күндү «Саха» НКИХ «Тэтим-Саха араадьыйатын» сөбүлээн истээччилэр, быһа эпиирдэри көтүтүмэҥ, сэргэх истээччи, көхтөөх кыттааччы буолуҥ! Намҥа үлэлиир устуудьуйа төлөпүөнэ: 8-411-62-41-505.
Елена ПОТОЦКАЯ, «Саха сирэ» хаһыат, edersaas.ru