Саха араадьыйата дойдубутугар сыллата сайда, тэнийэ турара олус кэрэхсэбиллээх. Улуустар эмиэ радиостудияланан эрэллэриттэн үөрэбит. Саха тыллаах элбииригэр араадьыйа сүдү оруоллаах, биир бастыҥ кыахтаах ситим.
edersaas.ru, Полина-Победа
Мин бэйэм 15 саастаахпыттан 35-пэр диэри нууччалыы эйгэҕэ сылдьан, төрөөбүт тылбыттан тэйэ быһыытыйбытым, икки тылы булкуйан саҥарар «алдьаммыт тыллаах» дьоннортон биирдэстэрэ мин буолбутум.
7-8 сыл анараа өттүгэр билигин истэр «Тэтимим» долгунугар Индира «Арахсыы» диэн кэпсээни аахпытын таба түбэһэн истибитим. Онтон ыла кэтии, истэ сылдьаммын Лена Петрова диэн олус кэрэ куолаһын сөбүлээн, араадьыйаҕа бастакы сыстыым саҕаламмыта. Ол кыыс куолаһа сүрэҕим-быарым ортотунан киирэрэ.
Истэн бардаҕым аайы сөбүлүүрүм элбээн испитэ: редактор Альбина Тарабукина биэриилэрэ, өрөспүүбүлүкэ үтүө дьонун сырдатарын олус кэрэхсээн истэрим.
«Ахтан-санаан ааһыаҕыҥ» диэн Кирилл Семёнов биэриитин арыт харах уулаах истэрим. Биэриитин аатыгар оруобуна сөрү-сөп түбэһэр куолаһын иһиттэҕим аайы …
Эдэрдии эрчимнээхтик успуорт эйгэтин Баһылай Бэһиэлискэй иһитиннэрэр. Оҕотуттан саастаахтарга тиийэ сиһилии кэпсиир.
Прокопий Хабаров тыа сирин туруу үлэһит дьонун, улуустарга араас хайысханан үлэлии сылдьар бааһынай хаһаайыстыбалары, эдэр да ыаллар үлэттэн чаҕыйбакка сөптөөхтүк дьаһанан олороллорун сырдатара олус кэрэхсэбиллээх.
Ону таһынан араас эйгэни хабан элбэх редактордар биэриилэрэ бэйэлэрин тула истээччилэрин түмэ тардаллар.
Тэтим «Эрдэһиттэрэ» хайдах курдук сэргэхтэрин, биэриилэрэ интэриэһинэйин пандемия кэмигэр дьон санаатын көтөхпүтүн бары билэбит.
Альбина Тарабукина хайдах курдук хорсуннук, үһүйээн хоту буолбакка, бэйэтинэн миэстэтигэр тиийэн биэриилэрин ыыппытын бары сөхпүппүт. «Кытаатан бэйэҕин харыстан» диэн истиҥ илдьиттэрин батсаабка суруйаллара.
Аһаҕас эпииргэ холбонон истээччилэри кытта кэпсэтэллэр, чугас дьонноругар эҕэрдэ этэн, ардыгар ыллаан, оонньоон дьон санаата олус көтөҕүллэр
«Тэтими» истээччи, сэргээччи күннэтэ элбиир, элбии да туруоҕа.
Дьон дууһатын кытта үлэлэһэр, бэйэлэрин сүрэхтэрин сылааһын тириэрдэр ыытааччылардаах араадьыйа диэн сыаналыыбын.
Киэһээҥҥи эдэрдэргэ аналлаах «Музыкальнай канал» ыытааччылара биир туспа иһирэх, талааннаах ыччаттар үлэлиллэр.
Араадьыйа үлэһиттэрэ бары биир сүбэнэн саба түһэн инники биэриилэрин торумнуулларын, күнүстэри-түүннэри телефонтан ордубакка матырыйаалларын көрдөнөн, элбэх киһилиин кэпсэтэн, сыраларын биэрэн таҥмыт программалара биһиги дууһабытын сымната, сүрэхпитин үөрдэ, кэрэҕэ кыттыһыннара, үтүөҕэ угуйа туралларыгар махталбыт улахан.
«ТЭТИМНЭРИ» ТАПТЫЫБЫН
/»Тэтим» истээччилэригэр аныыбын/
Көмөлөөтө барыта:
Ковид, куйаас, буруобут.
Киксибиттии кинилэр
Бары биири этэллэр:
«Олор дьиэҕэр, тахсыма»
Олордубут дьэ тото:
Сандал сааспыт ааспыта,
Самаан сайын даҕаны
Ааһыа дьиэбит иһигэр,
Сэрэйээхтиир сүрэхпит
Алта уон биэс саастанан
Үбүлүөйдээн үөрбүтүм,
Оруобуна ол сааһым
Харантыыҥҥа хаптарда,
Харыстанар саас үһү.
«Унаар буруо субуйдун»-
Ыллыыр Киджа ырыата
«Куда еще оо, Киджа-а
Итак буруо быыһыгар
Олоробут дии бары»
Маҕаһыыҥҥа тахсарга
Мааска кэтэр буоларбыт,
Аны дьиэҕэ кытары
Кэтиҥ дииллэр буруоттан,
Айахпытын бүөлүүллэр
Саҥарарбыт ахсааннаах —
Айах өрүү сабыылаах,
Суруйарым ол иһпн
Элбиир миэнэ күннэтэ
Этинэбин санаабын.
Араадьыйам эрэллээх
Аралдьытар күннэтэ,
Боппот кини истэрбин
Тэтимнэри таптыырбын
Вирус бобор кыаҕа суох.
Полина-Победа
Уус Алдан
18.07.2020с.