Саҥа Төрүт Сокуон үлэһит киһиэхэ, дьиэ кэргэҥҥэ, ыччакка, оҕоҕо үтүөнэн эрэ дьайыаҕа

РФ Төрүт Сокуонугар уларытыылар дьиэ кэргэн уонна ыал буолуу институттара бөҕөргүүрүгэр, оҕо саас кэмин судаарыстыба сүрүн сыаннаһынан уонна киэн туттуутунан билинэригэр туһуланарын Ньурба улууһун элбэх оҕолоох дьиэ кэргэттэрэ олус сэргээн аахтылар.

Ньурба куоратыгар олорор биэс оҕолоох Егоровтар бу туһунан санааларын үллэстэллэр:

– Биһиги аҕабыт Сергей Афанасьевич Егоров ГОК операторынан, улахан уолбут УНО-ҕа силиэсэринэн үлэлииллэр. Иккис уол Ньурбатааҕы тиэхиньиичэскэй лиссиэйи бүтэрэр, икки оҕо оскуолаҕа үөрэнэллэр, саамай кырабыт “Аленушка” оҕо саадын выпускнига, быйыл эмиэ оскуола киһитэ буолар. Онон, оҕолорбут иннилэрин санаан, сыта-олоро буолаары турар Төрүт Сокуоҥҥа уларыйыылары киллэрэр куоластааһын иннинэ дойду үрдүнэн барар дьүүллэһиигэ биһиги кыттыһан санаабытын этэбит.

Бу иннинээҕи Төрүт Сокуоҥҥа оҕо туһунан туспа тутуллан суруллубатаҕа. Хас биирдии омук, бэйэтин үгэстэринэн салайтаран, оҕотугар сыһыаннаһара, иитэрэ-такайара. Сорох-сорохторго токурутуулар да бааллар быһыылаах. Ону хас биирдии оҕо Арассыыйа гражданина, кини судаарыстыбанан харыстанар сүрүн сыаннаһа, киэн туттуута буоларын бу саҥа Төрүт Сокуон чиҥник бигэргэтэр уонна өйөбүлү мэктиэлиир. Бу Төрүт Сокуонунан бигэргэтэр мэктиэтин судаарыстыба хайаан да сокуоҥҥа олоҕурбут чэпчэтиилэринэн, үбүнэн өйүүрэ хас биирдии киһиэхэ инникигэ эрэли үөскэтэр.

Ол курдук, уларытыылар олоххо киирдэхтэринэ, эдэр ыаллар судаарыстыба өттүттэн араас субсидияларынан, элбэх оҕолоохтор эбии чэпчэтиилэринэн туһаналлара, ыччат үөрэхтэнэригэр, үлэлээх буоларыгар болҕомто ууруллара саарбаҕа суох.

Саҥа Конституция үлэһит киһиэхэ, дьиэ кэргэҥҥэ, ыччакка, оҕоҕо үтүөнэн эрэ дьайыа диэн санааҕа кэллибит.

«Ньурба» хаһыат, ulus.media саайтан.