Бэс ыйын 2-8 күннэригэр Дьокуускайга Арассыыйатааҕы “Территория. Якутск” диэн аныгы ускуустуба бэстибээлэ аан бастаан ыытыллар. Манна аныгы худуоһунньуктар быыстапкалара, дойду бастыҥ тыйаатырдарын туруоруулара, уулуссаҕа көрдөрүллэр испэктээкиллэр, лиэксийэлэр, маастар-кылаастар, о.д.а. буолуохтара. Бэстибээл бырагыраамата олус киэҥ, интэриэһинэй. Дьэ, ханнык испэктээкиллэр, быыстапкалар буолаллар эбитий?
Бэс ыйын 2 күнүгэр күнүс 3 чаастан “Картон” туруорууну Национальнай художественнай мусуой тиэргэнигэр көрдөрдүлэр. Хортуон олоҕун, айылҕаҕа бүппэт эргиирин, киһи олоҕун кытары тэҥнээн көрүү туһунан Санкт-Петербург режиссера Кирилл Люкевич интэриэһинэй туруоруута.
Бэс ыйын 3 күнүгэр киэһэ 7 чаастан Опера, балет тыйаатырыгар “Такие разные мы” музыкальнай-поэтическай испэктээкилгэ Евгения Добровольскай уонна Сергей Чонишвили биллэр бэйиэттэр: Мариан Цветаева уонна Борис Пастернак, Анна Ахматова уонна Николай Гумилев, Георгий Иванов уонна Ирина Одоевцева, Евгений Евтушенко уонна Белла Ахмадуллина бэйэ-бэйэлэригэр анаан суруйбут хоһооннорун ааҕыахтара. Скрипкаҕа Елена Ревич, фортепианоҕа Полина Осетинская оонньууллар.
Бу күн Суорун Омоллоон аатынан Опера, балет тыйаатырыгар “Территория. Якутск” бэстибээл аһыллыыта буолар.
Бэс ыйын 4 күнүгэр 4 уонна 7 чаастан Үүнэр көлүөнэ тыйаатырыгар “Я, бабушка, Илико и Илларион” диэн тулаайах грузин уолун туһунан моно-испэктээкилгэ режиссер Георгий Иобадзе соҕотоҕун оонньуур.
Бэс ыйын 5 күнүгэр 4 уонна 6 чааска Үүнэр көлүөнэ тыйаатырыгар “Полюс. Золотой сезон” куонкуруска 3-с миэстэлээх “Буратино” испэктээкилгэ Шарыпово куорат драматическай тыйаатырын артыыстара ыҥыраллар. А.Толстой аймньытын аныгылыы хайдах көрдөрөллөр эбитий?
“Балет Москва” тыйаатыр Бельгия хореограба Карин Понтьес туруорбут “Все пути ведут на Север” үҥкүүнэн испэктээкилин бэс ыйын 5 күнүгэр 7 чаастан Опера, балет тыйаатырыгар көрдөрүөҕэ. Испэктээкил “Золотая маска-2017” номинациятын лауреата.
Мииринэйдээҕи тыйаатыр бэс ыйын 6 күнүгэр 4 уонна 7 чаастан Саха тыйаатырыгар Д.Мамин-Сибиряк аыймньытынан “Озор” испэктээкилин көрдөрөр.
“Золотая маска” бириэмийэ лауреаттара Вячеслав Игнатов уонна Мария Литвинова “Сказки роботов о настоящем человеке” остуоруйаны роботтар көмөлөрүнэн олус интэриэһинэйдик көрдөрөллөр. Роботтары артыыстар хамсаталлар.
Саха тыйаатыра бэс ыйын 7 күнүгэр 7 чаастан “Алитет уходит в горы” испэктээкилин көрдөрүөҕэ. Ону тэҥэ, Үүнэр көлүөнэ тыйаатыра “Хроника безумия” испэктээкилэ Достоевскай “преступление и наказание” айымньытынан туруоруллубут. Бу испэктээкил “Полюс. Золотой сезон” куонкуруска 1-кы миэстэлээх. Режиссер – Александр Титигиров.
Бэстибээли түмүктүүр “Эбеновая кожа” музыкальнай испэктээкилгэ биллэр артыыстар Юлия Пересильд, Петр Главатских оонньууллар.
Биир интэриэһинэй көрүҥүнэн 2021 сылга “Кульминация” куонкуруска талыллыбыт 3 пьесаны ааҕыы буолуо. Манна артыыстар пьеса тиэкиһин саҥа ааҕан, оруолга киириилэрэ, режиссер үлэтэ, уо.д.а. көрөөччүгэ сонун көстүү. Манна “Переспать с Леной и умереть” (ааҕар Павел Ченянов), “Белый шум” (ааҕар Василий Борисов), “Чернай пурга” (ааҕар Роман Дорофеев) пьесалары ааҕыахтара.
Маны тэҥэ, Москватааҕы аныгы ускуустуба мусуойа “Человек и его ландшафты” быыстапканы Национальнай художественнай мусуойга бэс ыйын 4 күнүттэн от ыйын 17 күнүгэр диэри туруоруоҕа. Москватааҕы аныгы ускуустуба мусуойун научнай отделын салайааччы Андрей Егоров эппитинэн, бу быыстапка икки түһүмэхтээх: бастакытынан, Киһи уонна тас эйгэ дьайсыыта, иккиһинэн, худуоһунньуктар Киһи ис эйгэтин арыйаллар, чинчийэллэр.
—Аныгы ускуустуба айымньыларын сорох дьон өйдөөбөттөр, ол эрээри, үгүстэри толкуйдатар, ырытыыга, кэпсэтиигэ ыҥырар буоллаҕына, сыалын ситэр, — диэн кини эттэ.
Маны тэҥэ, бэстибээл кыттааччыларыгар анаан үҥкүүгэ, муусукаҕа, сценическэй дьайыыга, о.д.а маастар-кылаастар, лиэксийэлэр буолуохтара.
Ангелина Васильева, “Саха сирэ” хаһыат, edersaas.ru
Хаартыска: sakhagov.ru