Дьокуускай куорат аэропуордун стратегическай суолталаах биир улахан бырайыага – аан дойду хайысхатынан көтөр терминалы саҥардыы. Быйыл бырайыак үбэ-харчыта быһаарыллан, докумуон барыта чопчуланыахтаах.
edersaas.ru
Ол чэрчитинэн көтөн кэлбит уонна саҥа көтөр айанньыттар бөлөхтөрө тус-туһунан арахсыахтаах, таһаҕаһы тиэйии хонтуруоллуур ситиминэн хааччыллыахтаах, итиэннэ терминалга бэйэтэ тахсар трап тардыллыаҕа. Билиҥҥи туругунан итинник трап Арассыыйа иһинэн көтөр 2012 сыллаахха тутуллубут дьиэҕэ баар, ону омук сиригэр көтөр терминалга көһөрө сылдьан туттуохтарын пограничнай сулууспа ирдэбилэ хааччахтыыр.
Кыраныысса таһыгар көтөр терминал тупсарыллан биэрдэҕинэ, саҥа авиахампаанньалар кэлэн, дьон кэлиитэ-барыыта элбиэҕэ диэн этэллэр Дьокуускай аэропуордун пресс-сулууспатыгар.
Тэрилтэ официальнай иһитиннэриитинэн, аэровокзал иһэ эмиэ аныгы үйэ ирдэбилинэн оҥоһуллан, сырдаан, тупса түһүөҕэ, көтөр уонна дьоннорун көрсөр-атаарар дьоҥҥо араас төлөбүрдээх өҥөлөр үлэлиэхтэрэ.
Сөмөлүөт түһэр-көтөр балаһата уонна аан дойду хайысхатынан саҥа терминал оҥоһулуннаҕына, 2032 сылга дьон сырыыта 1,5 төгүл эбиллиэхтээх.
«Арассыыйа тырааныспарын ситимин 2010-2020 сылларга диэри сайыннарыы» судаарыстыбаннай бырагыраама чэрчитинэн, 2018 сыл ыам ыйыгар Дьокуускай аэропуордугар сөмөлүөт түһэр-көтөр балаһатын оҥоруу улахан үлэтэ саҕаламмыта. Итиниэхэ үлэлии турар балаһа 970 миэтэрэтэ хабыллыбыта, ону таһынан, икки РД – А уонна РД – В салайар суол өрөмүөн бүтүөр диэри сабыллан тураллар.
Онон былырыыҥҥыттан сөмөлүөттэр 2248 миэтэрэ уһуннаах иккис балаһаттан көтөллөр. Көтөр ааллар турар сирдэригэр тиийэллэригэр РД–Д биир салайар суолу тутталлар. Сөмөлүөттэр маннык туруктаах балаһанан 2020 сыл кулун тутарыгар диэри сылдьыахтара. 2019 сылга балаһа уларыйыа суоҕа, арай 200 миэтэрэ өссө уһатан биэриэхтэрэ.
Константин Сергеев, Дьокуускай аэропуордун генеральнай дириэктэрин 1 солбуйааччы: «2020 сылга ыам ыйыттан алтынньыга диэри тутуу үлэтин кэмигэр көтөр-түһэр балаһа 1623 миэтэрэҕэ, оттон көтүүгэ 1725 миэтэрэҕэ диэри кыччаан биэриэҕэ. Биир сезон иһигэр 300 миэтэрэлээх пандус уонна 800 миэтэрэ уһуннаах балаһа оҥоһуллуохтаах, ол иһин итинник быһаарыныы ылынарга күһэлиннибит. 2020-2021 сыл кыһыҥҥы кэмигэр 3,5 килэмиэтир уһуннаах балаһа толору үлэҕэ киириэҕэ.
Көтөр ааллар хааччаҕа суох көтөллөрүн туһугар уонна стыковочнай көтүүнү тэрийэргэ саҥардан оҥоруу кэмигэр былырыыҥҥыттан Координационнай штаб үлэлиир. Онно авиация тэрилтэлэрэ уонна кинилэри хонтуруоллуур биэдэмистибэлэр киирэллэр. Штаб кыһалҕаны быһаарарга араас хайысханы үөрэтэр. Дьон дойду киин куораттарыгар Нерюнгри, Мииринэй, Полярнай о.д.а. нөҥүө көтүөхтэрэ.
Маны таһынан, Дьокуускайтан Новосибирскайга диэри S7 Airlines авиахампаанньа Embraer-170 LR сөмөлүөтүнэн күн ахсын 5-тэ көтүөҕэ. Ити куорат Толмачево аэропуордуттан, улахан сөмөлүөттэр түмсэр сирдэрэ буолан, дьон аан дойду хайа баҕарар уһугар көтүөн сөп. Билигин сууккаҕа 7 рейсэ оҥоһулларын туһугар кэпсэтии ыыта сылдьабыт», — диэн иһитиннэрдэ.
Марианна Тыртыкова, «Саха сирэ», edersaas.ru