Максим Терещенко: «Гаас баар сиригэр саҥа тэрилтэлэр арыллыахтара»
«Газпром» 2021-2025 сылларга Саха сирин гаастааһын бырагырааматынан гааска холбонор тэрилтэлэр уонна саҥа үлэ миэстэлэрэ арыллыахтара», — диэн Бырамыысалыннас уонна геология миниистирэ Максим Терещенко эттэ.
edersaas.ru
Санатар буоллахха, балаҕан ыйын 21 күнүгэр СӨ Ил Дархана Айсен Николаев «Газпром» аһаҕас акционернай уопсастыба бэрэссэдээтэлэ Алексей Миллеры кытта 2021-2025 сылларга Саха сирин гаастааһын бырагыраамаҕа сөбүлэҥ түһэрсибитэ.
Максим Терещенко этэринэн, тэрилтэлэр гааска холбоннохторуна, ороскуоту толуйар кыах тахсар, итиэннэ баар бырайыактары олоххо киллэрэргэ, саҥа бырайыактары ылсарга кыах бэриллэр.
«Маны таһынан, биэс нэһилиэнньэлээх пуун – Үөһээ Кураанах, Хатыстыыр, Кээччи, Абаҕа уонна Нефтебаза 2030 сылга дылы гааска холбонуохтара», — диэн миниистир эттэ.
Бу улахан бырагыраама олоххо киирдэҕинэ, Саха Өрөспүүбүлүкэтин 40,80%-на гааска холбонор. «Газпром» өттүттэн үбүлээһин биллэ улааппыта — 9 млрд. солк. көрүллүбүт.
Дойду Бэрэсидьиэнэ Владимир Путин «Газпром» бэрэссэдээтэлэ Алексей Миллеры кытта балаҕан ыйынааҕы оробуочай көрсүһүүтүгэр Арассыыйа субъектарын гаастааһын хаамыытын чопчуласпыта. Алексей Миллер этэринэн,«Газпром» биир сүрүн социальнай бырайыагынан Арассыыйа субъектарыгар гааһы киллэрии буолар. Ол чэрчитинэн тэрилтэ 2020 сыллаахха үбүлээһини 1,6 төгүл улаатыннарбыт. Инвестиция кэриҥэ 56 миллиард солкуобайга тэҥнэспит. Бүтүн Арассыыйа үрдүнэн 2350 км гаас боруобата тардыллара, 319 нэһилиэнньэлээх пуун гааска холбоноро, 410 хочуолунай тутуллара күүтүллэр».
Ирина Ханды, “Саха сирэ” хаһыат, edersaas.ru