Өлүөхүмэ улууһун иккис Нөөрүктээйи олохтоохторо күн ахсын биир туонна кэриҥэ үүтү туттараллар.
Нэһилиэккэ аҕыс бааһынай хаһаайыстыба баарыттан биир бастыҥнара Терентьевтар хаһаайыстыбалара буолар. Бөһүөлэккэ киирэргэ аныгы матырыйаалынан оҥоһуллубут сүөһү иитэр комплекс кылбайар.
Комплекс иһэ сып-сырдык, ып-ыраас, ынахтар уонна ньирэйдэр көрүҥнэрэ үчүгэй, бары чиптээхтэр, кыбыыга кур от көстөр … барыта хаһаайка дьаһаллааҕын туоһулуурга дылылар.
— Ийэм сопхуос ыанньыксыта этэ, онон сүөһүгэ оҕо эрдэхпиттэн үлэлиибин, – диэн кэпсиир Мария Дмитриевна, — Бэйэбит ыал буолуохпутуттан сүөһүлэммиппит. Кэргэммин, Андриян Михайловиһы, кытары сүбэлэһэммит, 2005 с. бааһынай хаһаайыстыбатын тэриммиппит. Үүппүтүн «Өлүөхүмэ кыладабыайыгар» туттарар, харчытын кэмигэр ылар буоламмыт, сүөһүбүт ахсаанын сыыйа элбэтэн испиппит. Хотоммут эргэрэн, кыараан, 2016 сыллаахха бааһынай хаһаайыстыба баазатыгар дьиэ кэргэн пиэрмэлэрин тэрийии бырагырааматыгар киирсэн, 4,8 мөл. солк. граны ылбыппыт. Ол үпкэ тирэҕирэн, 80 сүөһү киирэр хотонун туттубуппут, ынах ыыр тэрили, тиэхиньикэни уонна биэс ыанар ынаҕы атыыласпыппыт. Күн бүгүн 109 сүөһүлээхпит, ол иһигэр 40 ыанар ынахтаахпыт, 35 ньирэйдээхпит. Күн ахсын 300 киилэ үүтү туттара олоробут, ол эбэтэр от ыйын устатыгар тоҕус туонна үүтү туттардыбыт.
Тыа сиригэр сүрүн дохуот үүттэн эрэ киирэр буолан, сүөһүттэн илиини араарбакка үлэлээтэххэ сатанар. Дьон ону өйдөөн, сүөһү үлэтин өрө тутар буолла, ордук үөрүүлээҕэ эдэр дьоннор бу эйгэҕэ ылсан эрэллэр. Биһиги үлэһиттэрбит бары эдэрдэр, ол курдук, Снежана Кондратьева иккис сылын ыанньыксыттыыр, Алексей Туксинов уонна Александр Согдоев оробуочайдыыллар. Билигин Андриян Михайловичтыын Намтаҕайынан уонна Күөх Арыынан оттуу сылдьаллар. Сыллата 300 туоннаны оттуур этибит да, быйыл курааннаан үүнүү мөлтөх. Инньэ гынан халлаан төһө турарынан, ыкса күһүҥҥэ диэри сирийэн оттуохпут уонна эбии от атыылаһыахпыт. Ынахпыт ахсаанын аҕыйатар санаабыт суох.
Хаһаайыстыба баһылыга Мария Дмитриевна бэйэтэ Кыыллаах Арыыттан төрүттээх, өрөспүүбүлүкэ тыатын хаһаайыстыбатын туйгуна, Ил Түмэн Бэрэссэдээтэлин солбуйааччы Александр Жирков быйыл Өлүөхүмэ куоратыгар ыытыллыбыт Олоҥхо ыһыаҕар киниэхэ Ил Түмэн Махтал суругун туттарбыта.
Өлүөхүмэттэн Валерий Малышев, «Саха сирэ», edersaas.ru сайтка анаан