«Новое Знание» марафон бастакы күнүн онлайнынан биэс мөлүйүөнтэн тахса киһи көрдө.
Бу туһунан тэрийээччилэр пресс-сулууспалара иһитиннэрэр. Марафон кыттыылаахтарыгар РФ Бэрэсидьиэнин дьаһалтатын салайааччытын бастакы солбуйааччы Сергей Кириенко, РФ Бэрэсидьиэнин көмөлөһөөччүтэ Андрей Фурсенко, Госдума вице-спикерэ Петр Толстой, телебиэриини ыытааччылар Владимир Соловьев уонна Владимир Познер, «Курчатовскай институт» НИЦ бэрэсидьиэнэ Михаил Ковальчук, «Яндекс» стратегическай маркетинг дириэктэрэ Андрей Себрант, кинорежиссер уонна продюсер Тимур Бекмамбетов, блогер Илья Варламов, дизайнер Артемий Лебедев тыл эппиттэр.
Үс күннээх марафон Москваҕа, Санкт-Петербурга, Казаньҥа, Нижнэй Новгородка, Сочига, Владивостокка, Новосибирскайга, Калининградка ыытыллар. Хас биирдии куорат сырдатар хайысхалаах: устуоруйа уонна култуура, успуорт, наука уонна технология, индустрия уонна бырамысыланнас. Тэрээһин бырагырааматыгар сүүстэн тахса дискуссия, лиэксийэ, интервью, аһаҕас уруоктар уонна маастар кылаастар былааннаммыттар.
«Марафоҥҥа кыттарга үс тыһыынчаттан тахса киһи регистрацияламмыт», — диэн иһитиннэриигэ этиллэр.
Кулун тутар 26 күнүгэр РФ Бэрэсидьиэнэ Владимир Путин кыттыылаах «Россия — страна возможностей» АНО кэтээн көрөр сэбиэтин мунньаҕар «Лидеры России. Политика» күрэс кыайыылааҕа Максим Древаль Сэбиэскэй Сойуус саҕана баар уһулуччулаах сырдатыыга уонна үгэстэргэ тирэҕирэн, билии-көрүү аныгы уонна технологическай платформатын тэрийэргэ этии киллэрбитэ. Холобурунан «Знание» уопсастыба а5алыллыбыта. Дойду баһылыга бу этиини өйөөбүтэ уонна муус устар 21 күнүгэр Федеральнай мунньахха Анал этиитигэр кини «Знание» уопсастыба билиҥҥи цифровой платформаҕа көһөрө уһулуччу суолталааҕын бэлиэтээбитэ. Марафон «Знание» уопсастыба киэҥ хабааннаах үлэтигэр тирэх буолуо.