Бэҕэһээҥҥиттэн Дьокуускайга, “Кыайыы 50 сыла” Спорт дыбарыаһыгар остуол тенниһигэр Уһук Илиҥҥи уокурук чөмпүйэнээтэ ыытылла турар. Күрэхтэһиигэ Хабаровскай, Приморье кыраайдарыттан, Амур, Сахалин, Магадан уобаластарыттан уонна Саха Өрөспүүбүлүкэтиттэн 114 спортсмен кыттар.
Саха сирин чиэһин эр дьоҥҥо Василий Румянцев (Уус Алдан), Ньургун Сабарайкин (Чурапчы), Анатолий Ефремов (Дьокуускай), Богдан Капитонов (Бүлүү) уонна Михаил Кылабысов (Мэҥэ Хаҥалас) көмүскүүллэр. Дьахталлар сүүмэрдэммит хамаандаларыгар Екатерина Лыппахова (Ленскэй), Вероника Степанова (Сунтаар), Марфа Колодезникова (Горнай), Александра Ефимова (Чурапчы), Ольга Тихонова (Дьокуускай) бааллар.
Бастакы күн түмүгүнэн дьахталларга хамаанданан бастыыр иһин күрэс кыайыылааҕынан Приморье тенисистэрэ буоллулар. Саха сирин кыргыттара иккис, магаданнар итиэннэ хабаровскайдар үһүс миэстэлэргэ таҕыстылар. Эр дьоҥҥо Приморье уонна Саха сирин хамаандалара биир күүстээхтэринэн биллэллэр.
Тохсунньу 26-28 күннэригэр спортсменнар биирдиилээн, пааранан уонна уол-кыыс диэн оонньууга күрэс былдьаһыахтара.
Күрэхтэһии кыайыылаахтара олунньу ыйга Пенза куоракка буолар дойду чөмпүйэнээтигэр кыттар быраабы ылыахтара.
Роман Попов, “Саха сирэ” хаһыат
Sportyakutia.ru хаартыскалара