Тэлгэһэҕэ уонна уопсастыбаннай сирдэргэ туох оҥоһулларын нэһилиэнньэ быһаарар...
Олох-дьаһах

Тэлгэһэҕэ уонна уопсастыбаннай сирдэргэ туох оҥоһулларын нэһилиэнньэ быһаарар

2017 сылга федеральнай бүддьүөттэн «Куоракка тупсаҕай эйгэни олохтооһун» дьоһун бырайыакка 195 мөл. солк көрүллүөҕэ.

Александр ТАРАСОВ, «Саха сирэ» хаһыат, http://www.edersaas.ru

   Аҕыйах хонуктааҕыта РФ тутууга миниистирэ Михаил Мень субъектары кытары селекторнай мунньахха ити бырайыакка кыттарга анал сайаапканы олунньу 10 күнүгэр диэри түһэриэхтээхтэрин ыйбыта уонна кулун тутар 1 күнүгэр диэри сайаапканы түһэрбит регионнары кытары анал сөбүлэһиигэ докумуон баттаныллыахтааҕын эппитэ.

«Куоракка тупсаҕай эйгэни олохтооһун» бырайыак икки сүрүн хайысхалаах: тэлгэһэни тупсарыы уонна уопсастыбаннай сирдэри оҥоруу. Бырайыакка кыттыан баҕалаах муниципальнай тэриллиилэр 2017 сыл муус устар 1 күнүгэр диэри анал бырагырааманы оҥорон, Уопсастыбаннай истиини тэрийэн, ону ыам ыйын 25 күнүгэр диэри бигэргэтиэхтэрин наада. Итини тэҥэ, тэлгэһэни тупсарыыга уонна уопсастыбаннай сирдэри оҥорууга анал дизайн-бырайыак сиһилии оҥоһуллуохтаах. Итини тэҥэ, сэтинньи 1 күнүгэр диэри муниципалитеттар 2018-2022 сыллардааҕы муниципальнай бырагыраамаларын бигэргэтиэхтээхтэр.

Федеральнай субсидиянан өрөспүүбүлүкэ үрдүнэн 1000-тан тахса нэһилиэнньэлээх 54 муниципальнай тэриллии уонна Мирнэй, Нерюнгри куораттар, Удачнай, Айхал, Аллараа Кураанах, Мохсоҕоллоох бөһүөлэктэрэ туһанар бырааптаахтар.

Бырайыак бырагыырааматыгар хайаан даҕаны дьиэлэргэ тиийэр суоллары, тэлгэһэни оҥоруу уонна уопсастыбаннай сирдэргэ ыскамыайканы, бөҕү-саҕы тоҕор анал ууруналары туруорууну сэргэ лаампалары ыйааһын киллэриллиэхтээхтэр. Оттон массыыналар турар сирдэрин, оҕо уонна спортивнай былаһааккалары оҥоруу, көҕөрдүү үлэтэ атын үбүнэн оҥоһуллуон сөп. Холобур, нэһилиэнньэ бэйэтин күүһүнэн оҥорор бырааптаах.

Ити сүрүн бырайыакка, саамай сүрүнэ, уопсастыбаннас баарын биллэрэн көхтөөхтүк кыттыахтаах. Ол эбэтэр, дьиэлэр тэлгэһэлэригэр туох оҥоһулларын нэһилиэнньэ бэйэтэ быһаарар.

Соторутааҕыта улуус, нэһилиэк баһылыктара Ил Дарханы кытта көрсүһүүлэригэр өрөспүүбүлүкэттэн көрүллэр субсидияны былырыын туһамматах муниципальнай тэриллиилэргэ биэрэр туһунан эппиттэрэ.

Кылгас ыспыраапка

Быйыл тупсаран оҥорууга үс сыллаах былааны олоххо киллэриигэ өрөспүүбүлүкэ бүддьүөтүттэн 450 мөл. солк. тыырыллыаҕа. Ол аата барыта бу хайысхаҕа 650 мөл. солк көрүллүөҕэ.

Баһылык санаата

Анна Доргонова, Бүлүү улууһун Лөкөчөөн нэһилиэгин баһылыга:

Тупсарыы сыла биллэриллэн, сөптөөх үп көрүллэн, тыа сирин тупсарыыга элбэх үлэ ыытылынна уонна ыытыллыа даҕаны. Грант үбэ көрүллүбэтэҕэ буоллар, маннык элбэх үлэни биир сайын иһигэр хайдах да үмүрүтүө суох этибит.

Соторутааҕыта буолбут Ил Дарханы кытта көрсүһүүгэ былырыын субсидияны ылбыттар быйыл кыттыбаттар диэбиттэрин кытта соччо-бачча сөпсөспөппүн. Куонкурус аата куонкурус буоллаҕа. Ким элбэх идиэйэлээх, ким үлэлиэн баҕалаах, ким отчуотун кэмигэр туттарбыт кыттыахтаах дии саныыбын.

Александр ТАРАСОВ, «Саха сирэ» хаһыат, http://www.edersaas.ru

0
0

Сайт матырыйаалларын ааптар көҥүлэ суох ылар бобуллар.

Ваш адрес email не будет опубликован.

четыре + восемнадцать =